Ադրբեջանում մարդու իրավունքները դանակի եզրին են. Յագլանդի քննադատությունը

Եվրախորհրդի գլխավոր քարտուղար Թորբյորն Յագլանդը բրիտանական հեղինակավոր The Guardian պարբերականում հրապարակել է հոդված, որում անդրադարձել է Ադրբեջանում մարդու իրավունքների ծայրաստիճան մտահոգող իրավիճակին: Ինչպես հաղորդում է «Արմենպրես»-ը, «Ադրբեջանում մարդու իրավունքները դանակի եզրին են. Միացյալ Թագավորությունը չպետք է անտարբեր անցնի» խորագրով հոդվածում Յագլանդը ներկայացրել է երկրում տիրող անիրավությունն ու ադրբեջանական իշխանությունների անտարբերությունը:

Յագլանդն արձանագրել է, որ ԵԽ նախարարների հանձնաժողովում Ադրբեջանի նախագահությունը, որն ավարտվում է այս տարվա նոյեմբերին, ինչպես նաև 2012 թվականին Բաքվում «Եվրատեսիլ» երգի մրցույթի անցկացումը տարբեր հասարակական կազմակերպությունների ու ակտիվիստների համար հնարավորություն էին բարձրաձայնելու երկրում առկա իրավախախտումները: Նա անդրադարձել է այն փաստին, թե ինչպես Ադրբեջանի իշխանություններն անտեսեցին ԵԽ-ի մասը հանդիսացող Մարդու իրավունքների եվրոպական դատարանի որոշումը' կապված հայտնի ընդդիմադիր գործիչ Իլգար Մամեդովի ձերբակալության հետ: Թեպետ ՄԻԵԴ-ն իր կայացրած վերջին որոշման մեջ վճռել էր, որ Մամեդովի ձերբակալությունը դեմ է Մարդու իրավունքների եվրոպական կոնվենցիային, ունի քաղաքական շարժառիթներ և պահանջել էր անհապաղ նրան ազատ արձակել, այդուհանդերձ Ադրբեջանը որևէ կերպ չէր արձագանքել դրան:

«Մենք ուշի ուշով հետևում ենք Ադրբեջանում մյուս իրավապաշտպանների հետապնդումներին: Ես կոչ եմ արել Եվրոպայի խորհրդի անդամ մյուս պետություններին, ովքեր իրենց ներկայացուցչություններն ունեն Բաքվում, հետևել երկրում ընթացող վերոնշյալ դատական գործընթացներին: Միացյալ Թագավորությունն արդեն դրական պատասխան է տվել»,- նշել է Յագլանդը: ԵԽ գլխավոր քարտուղարը նշել է, որ իրենք պարբերաբար տարբեր ահազանգեր են ստանում Ադրբեջանի հասարակական կազմակերպություններից' կապված այն փաստի հետ, որ երկրում գործող օրենքները շատ հաճախ սահմանափակում են իրենց գործունեությունը: Յագլանդը հայտնել է, որ իրենք պարբերաբար նախազգուշացնում են Բաքվին երկրում մարդու իրավունքների վատ վիճակի մասին: Նա մեջբերել է ԵԽ մարդու իրավունքների հանձնակատար Նիլ Մույժնիեկսի վերջերս պատրաստած զեկույցը' կապված Ադրբեջանում լրագրողների նկատմամբ բռնությունների և ձերբակալությունների հետ: «Մույժնիեկսը վերջերս բանտում այցելել էր հայտնի ադրբեջանցի ակտիվիստների' ներառյալ Անար Մամեդլիին և Լեյլա Յունուսին, և կոչ էր արել Ադրբեջանին դադարեցնել մարդու իրավունքների պաշտպանների ձերբակալությունները»,- հիշեցրել է Յագլանդը:

Նա դրական է համարել վերջերս Ալիևի կողմից 80 բանտարկյալի, այդ թվում և չորս իրավապաշտպանի համաներում շնորհելը: Յագլանդը նշել է, որ իրենք շարունակելու են ջանքեր գործադրել Ադրբեջանում քաղաքացիական հասարակության իրավունքների համար իրենց պայքարում: