ՄԱԿ-ի և ԵԱՀԿ-ի գլխավոր քարտուղարները քննարկել են Ուկրաինայի իրադրությունը

ՄԱԿ-ի գլխավոր քարտուղար Պան Գի Մունը ԵԱՀԿ-ի գլխավոր քարտուղար Լամբերտո Զանիերի հետ քննարկել է Ուկրաինայի իրադրությունը: Հանդիպումը կայացել է Վիեննայում, ուր Պան Գի Մունը ժամանել էր մասնակցելու ԵԱՀԿ-ի մշտական խորհրդի նիստին, տեղեկացնում է «Արմենպրես»-ը՝ հղում անելով ՄԱԿ-ի մամուլի ծառայությանը:

Երկու կազմակերպությունների վարչական ղեկավարները հանգամանորեն քննարկել են երկկողմ գործընկերության ամրապնդման հարցերը: «Ինչ վերաբերում է Ուկրաինային, նրանք կարծիքներ են փոխանակել ստեղծված իրադրության շուրջ, և ՄԱԿ-ի գլխավոր քարտուղարը շնորհակալություն է հայտնել ԵԱՀԿ-ին ճգնաժամի հուսալի լուծում գտնելու ջանքերին մասնակցելու համար»,- ասված է տարածված հաղորդագրության մեջ: ՄԱԿ-ի մամուլի ծառայությունում չեն բացահայտել բանակցությունների մանրամասները:

Նախօրյակին Պան Գի Մունը, ելույթ ունենալով ԵԱՀԿ-ի մշտական խորհրդի նիստում, ընդունել է, որ Ուկրաինայի իրադրությունը «խորը մտահոգության առարկա» է մնում: Նա հատկապես կանգ է առել նոյեմբերի 2-ին Դոնեցկի և Լուգանսկի ինքնահռչակ հանրապետություններում անցկացված ընտրությունների վրա՝ դրանք որակելով «իրադարձությունների անհաջող և անարդյունավետ զարգացում»: «Ես կոչ եմ անում բոլոր կողմերին՝ շտապ վերադառնալ Մինսկի արձանագրության և հուշագրի համապարփակ կատարմանը»,- հավելել է գլխավոր քարտուղարը:

Պան Գի Մունn աջակցություն է հայտնել Ուկրաինայի իրադրության կարգավորման նպատակով ԵԱՀԿ-ի գործադրած ջանքերին: «Մենք համատեղ պատասխանատվություն ունենք լարվածության թուլացման համար», և մենք աշխատում են ձեռք-ձեռքի տված»,- ասել է նա:

Պան Գի Մունի խոսքով՝ միջնորդության հարցերով զբաղվող ՄԱԿ-ի խորհրդատուներն օգնում են Ուկրաինայում գործող ԵԱՀԿ-ի Հատուկ դիտորդական պատվիրակությանը, կազմակերպությունը նաև ունի ընտրությունների օժանդակման, ազգային երկխոսության, իրավունքի գերակայության աջակցման և տնտեսական ու առևտրական քաղաքականության բնագավառի մասնագետներ: «Եկեք միավորենք մեր ջանքերն առաջիկա ամիսներին»,- հայտարարել է ՄԱԿ-ի գլխավոր քարտուղարը, հաղորդել է ՏԱՍՍ-ը: