«Մայա Փանջիկիձեն ընտանիքը նախընտրեց երկրից ու պետությունից». Ղարիբաշվիլի

Վրաստանի վարչապետ Իրակլի Ղարիբաշվիլին նոյեմբերի 5-ին ափսոսանք է հայտնել արտաքին գործերի նախարարի պաշտոնը թողնելու՝ Մայա Փանջիկիձեի որոշման կապակցությամբ, տեղեկացնում է «Արմենպրես»-ը՝ հղում անելով «Նովոստի Գրուզիան»:

Այն բանից հետո, երբ նախօրյակին Վրաստանի վարչապետ Իրակլի Ղարիբաշվիլին պաշտոնից հեռացրեց պաշտպանության նախարար Իրակլի Ալասանիային, Փանջիկիձեն, ինչպես նաև նրա բոլոր տեղակալները, նոյեմբերի 5-ին հայտարարեցին ԱԳ նախարարությունում իրենց զբաղեցրած պաշտոնները թողնելու և «Վրացական երազանք» կառավարող կոալիցիան լքելու մասին: Նախօրյակին պաշտոնաթողության մասին հայտարարել էր նաև եվրոպական և եվրատլանտյան կառույցներին ինտեգրացման հարցերով Վրաստանի պետնախարար Ալեքսի Պետրիաշվիլին:

«Ես ցանկանում եմ ասել, որ մենք, իհարկե, սպասում էինք, որ Պետրիաշվիլին և Փանջիկիձեն կթողնեն իրենց պաշտոնները: Ցավում եմ, որ Մայան ընտանիքը նախընտրեց երկրից ու պետությունից»,- հայտարարել է Ղարիբաշվիլին պաշտպանության նոր նախարար Մինդիա Ջանելիձեին պաշտոնապես ներկայացնելու ժամանակ:

Ալեքսի Պետրիաշվիլին Ալասանիայի «Մեր Վրաստանը-Ազատ դեմոկրատներ» կուսակցության անդամ է, իսկ Մայա Փանջիկիձեն՝ Ալասանիայի կնոջ՝ Նատի Փանջիկիձեի քույրը:

Վարչապետի խոսքով՝ առաջիկայում կներկայացվեն նաև նախարարների կաբինետի նոր անդամները՝ ԱԳ նախարարը և եվրոպական և եվրատլանտյան կառույցներին ինտեգրացման հարցերով պետնախարարը: