Բացահայտվել են Ադրբեջան Իրանի Նախագահի այցի որոշ մանրամասներ

Հայտնի են դարձել Իրանի Նախագահ Հասան Ռուհանիի Ադրբեջան կատարելիք այցի որոշ մանրամասներ: Ինչպես հաղորդում է «Արմենպրեսը»՝ վկայակոչելով ադրբեջանական ԶԼՄ-ները, Իրանի կապի և տեղեկատվական տեխնոլոգիաների նախարար, Իրան-Ադրբեջան համատեղ տնտեսական հանձնաժողովի համանախագահ Մահմուդ Վաիզին նոյեմբերի 5-ին Թեհրանում լրագրողներին հայտնել է, որ Հասան Ռուհանին Ադրբեջան պաշտոնական այց կկատարի եկող շա բաթվա վերջին:

Այցի ժամանակ Հասան Ռուհանիին կուղեկցեն կառավարության որոշ անդամներ, Իրանի արևելյան և արևմտյան Ատրպատականների, Արդեբիլի և Գիլանի նահանգների պաշտոնատար անձինք, մասնավոր հատվածի ներկայացուցիչներ:

Մահմուդ Վաիզիի խոսքով՝ Բաքվում անցկացվելիք բանակցություններում կքննարկվեն Ադրբեջանից էլեկտրաէներգիա գնելու և փոխադրելու հարցը, Իրան-Ադրբեջան սահմանի գետերից օգտվելու կանոնները, մաքսատների և փոխադրումների հետ կապված որոշ հարցերի լուծման ճանապարհները, գազի և էներգետիկայի, զբոսաշրջության և առևտրի բնագավառներում համագործակցությունը:

Մահմուդ Վաիզին հայտնել է, որ Իրանի Նախագահի այցի շրջանակում նախատեսվում է ստորագրել 10 փաստաթուղթ:

«Ներկայում երկու երկրների միջև առևտրաշրջանառության ծավալը կազմում է 500 մլն դոլար: Գտնում ենք, որ դա պետք է ավելացվի»,- ասել է նա:

Ադրբեջանի Նախագահ Իլհամ Ալիևը պաշտոնական այցով Իրանի Իսլամական Հանրապետություն էր մեկնել այս տարվա ապրիլին: