Վրաստանի ԱԳ փոխնախարարներից մեկը որոշել է ժամանակավորապես մնալ իր պաշտոնում

Չնայած Վրաստանի արտաքին գործերի նախարար Մայա Փանջիկիձեի այն հայտարարությանը, թե ինքը և իր բոլոր տեղակալները թողնում են իրենց զբաղեցրած պաշտոնները, Դավիթ Ջալաղանիան որոշել է ժամանակավորապես մնալ գերատեսչությունում, տեղեկացնում է «Արմենպրես»-ը՝ հղում անելով «Նովոստի Գրուզիան»:

Ինչպես Փանջիկիձեն հայտարարել էր նոյեմբերի 5-ին կայացած արատակարգ բրիֆինգի ժամանակ, իր հետ ԱԳ նախարարությունը լքում են առաջին փոխնախարար Դավիթ Զալկանիանին, ինչպես նաև տեղակալներ Թամարա Բերուչաշվիլին և Վլադիմիր Գուրգենիձեն: Փանջիկիձեն ասել էր, որ իրենց կմիանա Ջալաղանիան, որը պաշտոնական այցով գտնվում է Կուբայում:

«Ես վարչապետից առաջադրանք եմ ստացել՝ կատարելու առաջադրանքները... Ես ժամանակավորապես շարունակում եմ իմ գործունեությունը: Ստեղծված իրավիճակում ես, իրոք, իրավունք չունեմ հաշվի չառնել մեր արտաքին քաղաքական կարիքներն ու խնդիրները»,- ասել է Ջալաղանիան «Մաեստրո» հեռուստաընկերությանը:

Սպասվում էր, որ Վրաստանի արդարադատության նախարար Տեա Ծուլուկիանին, որը Ալասանիայի «Մեր Վրաստանը-ազատ դեմոկրատներ» կուսակցության անդամ է, պաշտոնաթող կլինի, բայց նա հայտարարել է, որ մնում է:

Ինչպես հաղորդել է «Իմեդի» հեռուստաընկերությունը, իր պաշտոնաթողության մասին հայտարարել է նաև ՆԱՏՕ-ում Վրաստանի ներկայացուցիչ Լևան Դոլիձեն: Նա Ալասանիայի կուսակցության ղեկավարներից մեկի՝ Վիկտոր Դոլիձեի եղբայրն է:

Կուսակցությունը նախօրյակին հայտարարել է «Վրացական երազանք» իշխող կոալիցիայից իր դուրս գալու մասին:

ԱՄՆ-ն անհանգստություն է հայտնել Վրաստանի կառավարությունում տեղի ունեցած պաշտոնաթողությունների կապակցությամբ: Ինչպես ասված է պետդեպարտամենտի պաշտոնական ներկայացուցիչ Ջեն Պսակիի հայտարարության մեջ, Վաշինգտոնում «անհանգստացած են» պաշտպանության նախարար Իրակլի Ալասանիայի, նրա տեղակալների, ինչպես նաև եվրատլանտյան ինտեգրացման հարցերով պետնախարար Ալեքսի Պետրիաշվիլիի և արտաքին գործերի նախարար Մայա Փանջիկիձեի ու նրա տեղակալների պաշտոնաթողություններից:

«Մենք բարձր ենք գնահատում իրենց երկրի հանդեպ այդ նախարարների վաստակը, ինչպես նաև ԱՄՆ-ի հետ նրանց գործընկերությունը»,- նշվում է հայտարարության մեջ:

«Մենք պնդում ենք, որ բոլոր կողմերն ուշադրությունը կենտրոնացնեն Վրաստանի եվրատլանտյան ապագան ապահովելու վրա: Մենք կոչ ենք անում Վրաստանի կառավարությանը՝ ցրել այն կասկածները, որ տվյալ դեպքում դատական համակարգը օգտագործվել է քաղաքական նպատակների հասնելու համար»,- ասված է Պսակիի հայտարարության մեջ: