«ՀԱՊԿ-ն որոշել է դադարեցնել ՆԱՏՕ-ի հետ երկխոսության հաստատմանն ուղղված ջանքերը». Բորդյուժա

Հավաքական անվտանգության պայմանագրի կազմակերպությունը որոշում է ընդունել չկատարել ՆԱՏՕ-ի հետ փոխհարաբերությունների կարգավորման վերաբերյալ կազմակերպության Հավաքական անվտանգության խորհրդի 2004 թվականի հանձնարարությունը: Այդ մասին, ինչպես տեղեկացնում է «Արմենպրես»-ը, նոյեմբերի 6-ին Մոսկվայու մ հայտարարել է ՀԱՊԿ-ի գլխավոր քարտուղար Նիկոլայ Բորդյուժան:

«Դադարեցված են ՆԱՏՕ-ի հետ երկխոսություն հաստատելուն ուղղված ջանքերը»,-ասել է նա ՀԱՊԿ-ի Խորհրդարանական վեհաժողովի խորհրդի նիստում:

Բորդյուժան պարզաբանել է, որ այդ որոշումն ընդունվել է «Ռուսաստանի և ՀԱՊԿ-ի նկատմամբ ԵՄ-ի և ՆԱՏՕ-ի ոչ կառուցողական և հաճախ բացահայտ թշնամական նախաձեռնությունների հաշվառմամբ»: Նրա խոսքով՝ ՀԱՊԿ-ն կշարունակի զարգացնել փոխգործակցությունը ԵԱՀԿ-ի հետ, ինչպես նաև քայլեր կկատարի Համագործակցության Շանհայի կազմակերպության, Չինաստանի, Իրանի, Լատինական Ամերիկայի և Կարիբյան ավազանի երկրների հետ համագործակցությունն ամրապնդելու ուղղությամբ:

ՀԱՊԿ-ի գլխավոր քարտուղարը լարվածության օջախների թվին է դասել Աֆղանստանի խնդիրը, ղարաբաղյան հակամարտության ռեցիդիվը, Ուկրաինայի իրադրությունը, ինչպես նաև ծայրահեղականների ակտիվացումը Իրաքում և Սիրիայում:

«Մենք տեսնում ենք միջազգային իրադրության հարաճուն անկայունությունը, քաոսի գոտիների մոտեցումը մեր պետությունների սահմաններին: Ուստի այսօր, ինչպես երբեք, ակտուալ է նոր, արդարացի, անվտանգ և բազմաբևեռ աշխարհակարգի ձևավորման խնդիրը, որի դեպքում ուժերի կենտրոնները չեն դիմակայում միմյանց, այլ համագորցծակցում են»,-իր հերթին ՀԱՊԿ-ի ԽՎ-ի նիստում հայտարարել է Պետդումայի նախագահ Սերգեյ Նարիշկինը:

Նա նշել է, որ աշխարհի կայուն անվտանգության հաստատման գործում իր ավանդն է ներդնում նաև ՀԱՊԿ-ն: «Մեր պետությունները համատեղ հաջողությամբ ամրապնդում են իրենց պաշտպանունակությունը և դիմակայում այնպիսի մարտահրավերների ու սպառնալիքների, ինչպիսիք են միջազգային ահաբեկչությունը, թմրաբիզնեսը, կազմակերպված հանցավորությունը և մարդավաճառությունը»,-ընդգծել է Նարիշկինը, հաղորդել է ՏԱՍՍ-ը: