ԳՖՀ-ում 350 կիլոմետրանոց խցանումներ են առաջացել գնացքների մեքենավարների գործադուլի պատճառով

Գերմանիայի ավտոմայրուղիներում նոյեմբերի 6-ին բազմակիլոմետրանոց խցանումներ են առաջացել գնացքների մեքենավարների գործադուլի պատճառով: Հեռավոր վայրեր մեկնելու համար ուղևորները հարկադրված են օգտվել ավտոմեքենաներից, տեղեկացնում է «Արմենպրես»-ը:

Ինչպես հայտնել է ADAC ավտոակումբը, խցանումների ընդհանուր երկարությունը նոյեմբերի 6-ին հասել է 348 կիլոմետրի:

Գործադուլը, որն անցկացնում է GDL արհմիությունը, սկսվել է նախօրյակին: Երևանի ժամանակով ժամը 18:00-ին աշխատանքը դադարեցրել են բեռնատար գնացքների մեքենավարները, նոյեմբերի 6-ին ժամը 5:00-ից նրանց են միացել Գերմանիայի տարբեր քաղաքների մարդատար գնացքների, ինչպես նաև էլեկտրագնացքների, օրինակ՝ Բեռլինի S-Bahn երկաթուղու էլեկտրագնացքների մեքենավարները:

ԶԼՄ-ները նշում են, որ գնացքների մեծ մասը չի երթևեկում: Գործադուլը, որը, ինչպես սպասվում է, կտևի մինչև նոյեմբերի 10-ի գիշերը, նոյեմբերի 6-ին Գերմանիայում դարձել է նորությունների գլխավոր թեման: Քաղաքային ծառայությունները Բեռլինի գործադուլից զգուշանում են նաև այն բանի համար, որ առաջիկա հանգստյան օրերին քաղաքը տոնելու է Բեռլինյան պատի անկման 25-ամյակը, մայրաքաղաքում սպասվում է հյուրերի մեծ հոսք:

Բացի ուղևորների համար ստեղծված բարդություններից, գործադուլը լուրջ ազդեցություն է գործում արտադրության վրա: Հումքային տնտեսության, գնումների և լոգիստիկայի միության ներկայացուցիչ Գունար Գրյուբեկը MDR հեռուստաընկերությանը հայտարարել է, որ վառելիքի մատակարարման գործում «ամեն դեպքում ընդհատումներ կլինեն»: Հատկապես կարող են տուժել ավտոմեքենաների ինդուստրիան, պողպատի, քիմիական արդյունաբերությունը: Նրա խոսքով՝ «ամեն դեպքում արտադրության անկում կլինի», հաղորդել է ՌԻԱ Նովոստին: