Մոգերինին կոչ է արել ԵՄ-ին չսահմանափակվել միայն Մոսկվայի վրա ճնշումներ գործադրելով

Ուկրաինական ճգնաժամից ելք գտնելու համար Եվրամիությանն անհրաժեշտ է ոչ միայն ճնշում գործադրել Մոսկվայի վրա, այլև նրա հետ շփման ուղիներ փնտրել: Այդ մասին, ինչպես տեղեկացնում է «Արմենպրես»-ը, Եվրամիության արտաքին գործերի և անվտանգության քաղաքականության նոր գերագույն ներկայացուցիչ Ֆեդերիկա Մոգերինին հայտարարել է Լեհաստանի արտաքին գործերի նախարար Գժեգոժ Սխետինայի հետ համատեղ անցկացված մամուլի ասուլիսում:

«Մեզ կպահանջվի միաժամանակ ուժեղ ճնշում գործադրել Ռուսաստանի վրա և նրա հետ շփվելու արդյունավետ ուղի գտնել, ինչը կբերի Ուկրաինայի միասնության պահպանման ընդհանուր լուծում գտնելուն»,-ասել է նա՝ պատասխանելով լրագրողների հարցերին:

Նաև, նրա խոսքով, անհրաժեշտ է, որ ԵՄ-ն և ՆԱՏՕ-ն Ռուսաստանի նկատմամբ մշակեն ընդհանուր, համակարգված դիրքորոշում: Մոգերինիի գնահատմամբ՝ Ուկրաինայում իրադրությունը զարգանում է բացասական սցենարով: «Այսպես կոչված ընտրությունները, որոնք նոյեմբերի 2-ին տեղի ունեցան Դոնբասում, դրությունը չեն շտկում, դրանք այն վատթարացնում են: Դրանք անօրինական են և արգելք են ստեղծում երկխոսության և լուծումներ գտնելու ճանապարհին»,-նշել է նա:

Ինչ վերաբերում է Ռուսաստանի դեմ նոր պատժամիջոցներ սահմանելուն կամ հները չեղարկելուն, եվրոպական դիվանագիտության ղեկավարը հիշեցրել է, որ այդ որոշումները պահանջում են Եվրամիության բոլոր 28 անդամ երկրների համաձայնությունը: Մոգերինիի խոսքով՝ նոյեմբերի 17-ին այդ հարցը կքննարկվի Բրյուսելում կայանալիք հերթական նիստի ընթացքում, հաղորդել է ՏԱՍՍ-ը: