Ժողովուրդը չի ների Սահակաշվիլիի կուսակցությանը նոյեմբերի 7-ի դեպքերի համար. Ղարիբաշվիլի

Վրաստանի վարչապետ Իրակլի Ղարիբաշվիլին նոյեմբերի 7-ին հիշել է 2007 թվականի իրադարձությունները, երբ Թբիլիսիի կենտրոնում ուժի կիրառմամբ ցրեցին ընդդիմության բողոքի մի քանի բազմամարդ ակցիաներ: Նա հայտարարել է, որ ժողովուրդը երբեք դա չի ների նախկին իշխող կուսակցությանը՝ «Միասնական ազգային շարժմանը», տեղեկացնում է «Արմենպրես»-ը՝ հղում անելով «Նովոստի Գրուզիա»-ին:

«Նոյեմբերի 7-ն այն ամսաթիվն է, որը ժողովուրդը երբեք չի ների «Ազգային շարժմանը»,- ասել է Ղարիբաշվիլին կառավարության նիստի սկսվելուց առաջ: Նրա խոսքով՝ 2007 թվականի նոյեմբերի 7-ն «արյունալի ամսաթիվ է» Վրաստանի պատմության մեջ:

«Նախկին իշխանությունները ծանր հանցագործություն կատարեցին իրենց երկրի ու ժողովրդի նկատմամբ՝ դաժանորեն ցրեցին հանրահավաքի խաղաղ մասնակիցներին, իրենց քաղաքացիներին, կոխկրտեցին նրանց անձնական արժանապատվությունն ու ժողովրդավարական պետության սկզբունքները: Ցանկանում եմ հիշել այն, թե ինչպես ներխուժեցին «Իմեդի» անկախ հեռուստաընկերություն»,- ասել է Ղարիբաշվիլին:

2007 թվականի նոյեմբերի 7-ին ոստիկանությունը հատուկ միջոցների՝ ջրանետների, արցունքաբեր գազի և ռետինե գնդակների կիրառմամբ Թբիլիսիի կենտրոնում ցրեց ընդդիմության բողոքի մի քանի բազմահազարանոց ակցիաները: Դրանց ընթացքում տեղի ունեցան ակցիաների մասնակիցների և ուժային կառույցների աշխատակիցների բախումներ: Նույն օրը ոստիկանությունը դադարեցրեց «Իմեդի» հեռուստաընկերության հեռարձակումը, որը պատկանում էր վրացի օլիգարխ Բադրի Պատարկացիշվիլիին:

Նոյեմբերի լույս 8-ի գիշերը երկրում մտցվեց արտակարգ դրություն: Վրաստանի առողջապահության նախարարության տվյալներով՝ հանրահավաքը ցրելու հետևանքով տուժել է ավելի քան 500 մարդ, որոնց թվում եղել են նաև ոստիկաններ: