Շներին զբոսանքի հանող իրանցիներին կպատժեն մտրակի հարվածներով

Իրանի իշխանությունները մշակել են մի օրինագիծ, որի համաձայն երկրի բնակիչներին արգելվում է պահել, զբոսանքի հանել և վաճառել շների ու կապիկների: Փաստաթղթում նշվում է, որ կանոնները չկատարելու դեպքում դրանց տերերին կարող է սպառնալ դաժան պատիժ՝ մտրակի 74 հարված կամ խոշոր դրամական տուգանք: Այդ մասին, ինչպես տեղեկացնում է «Արմենպրես»-ը, ասված է Իրանի դիմադրության ազգային խորհրդի կայքում զետեղված հաղորդագրության մեջ:

«Բոլոր նրանք, ովքեր զբոսանքի կհանեն շների ու կապիկների, որոնք վնասում են մարդկանց, մասնավորապես, կանանց ու երեխաների հանգստությանն ու առողջությանը, ինչպես նաև կզբաղվեն դրանց վաճառքով կամ կպահեն իրենց տներում, կտուգանվեն 300-ից մինչև 3000 դոլարի չափով կամ կպատժվեն մտրակի 74 հարվածներով: Կենդանիները բռնագրավվեն»,- ասված է փաստաթղթում:

Օրենքի ընդունվելու դեպքում երկրի առողջապահության նախարարությունը կհրապարակի այն կենդանիների ցուցակը, որոնք վնաս են հասցնում մարդու առողջությանը: Բռնագրավված կենդանիներին կուղարկեն կենդանաբանական այգիներ կամ ազատ կարձակեն «անտառում կամ անապատում»:

Սակայն այդ օրենքը չի տարածվի այն անձանց վրա, ում, իրենց մասնագիտության բերումով, անհրաժեշտ է կենդանիներ պահել: Խոսքը վերաբերում է ոստիկանությանը, հովիվներին ու որսորդներին:

Իրանի իշխանությունները հավանություն չեն տալիս շներ պահելու տեղի բնակչության ցանկությանը, քանի որ դա համարում են արևմտյան մշակույթի դրսևորում, հաղորդել է ՌԻԱ «Նովոստին»: