«Ժողովուրդը չի ների Սաակաշվիլիի կուսակցությանը նոյեմբերի 7-ի իրադարձությունների համար». Վրաստանի վարչապետ

Վրաստանի վարչապետ Իրակլի Ղարիբաշվիլին հիշատակել է  2007 թ. նոյեմբերի 7-ի իրադարձությունները, երբ Թբիլիսիի կենտրոնում ուժի կիրառմամբ ցրեցին ընդդիմության մի քանի հազարանոց բողոքի ակցիայի մասնակիցներին: Այս մասին գրել է newsgeorgia.ru-ն։

Նա հայտարարել է, որ ժողովուրդը երբեք չի ների նախկին իշխող «Միացյալ ազգային շարժում» կուսակցությանը:

«Նոյեմբերի 7-ն ամսաթիվ է, որը ժողովուրդը երբեք չի ների «Ազգային շարժում» կուսակցությանը»,- ասել է Ղարիբաշվիլին։

Ղարիբաշվիլիի խոսքերով` 2007թ.-ի նոյեմբերի 7-ը «արյունալի ամսաթիվ է» Վրաստանի պատմության համար։

«Նախկին իշխանությունները ծանր հանցանք են գործել իրենց երկրի և ժողովրդի հանդեպ. դաժանությամբ ցրել են խաղաղ ցուցարարներին, իրենց քաղաքացիներին, ոտնահարել են նրանց անձնական արժանապատվությունը և ժողովրդավարական պետության սկզբունքները։ Ցանկանում եմ հիշել այն, թե ինչպես նոյեմբերի 7-ին ներխուժեցին «Իմեդի» հեռուստաընկերություն։ Դա խոսքի ազատության ճնշում էր ուժի միջոցով։ Այդ և հաջորդ իրադարձությունները ցույց տվեցին, որ մեր հասարակությունը, ազատատենչ ժողովուրդը երբեք չի համակերպվի արժանապատվության հանդեպ ոտնձգություններին»,- ասել է Ղարիբաշվիլին։