Վաշինգտոնը Վրաստանի իշխանություններից պահանջում է բացառել քաղաքական հետապնդումները

ԱՄՆ-ի Պետդեպարտամենտը կրկին կոչ է արել Վրաստանի իշխանություններին՝ գործուն միջոցներ ձեռնարկել և ցրել այն կասկածները, որ երկրի դատական համակարգն իբր օգտագործվում է քաղաքական նպատակներով: Այդ մասին, ինչպես տեղեկացնում է «Արմենպրես»-ը, նոյեմբերի 7-ին հայտարարել է Պետդեպարտամենտի մամուլի խոսնակ Ջեն Պսակին:

«Իհարկե, երբ միաժամանակ մի քանի հետաքննություն է տարվում նախկին կառավարության անդամների և գործող ընդդիմադիրների նկատմամբ, դրանք լուրջ կասկածների տեղիք են տալիս քաղաքական հաշվեհարդարի հարցում: Կարևոր է, որ այդ ընկալումը բացառվի, և չպետք է կասկածներ առաջացան, որ դատական համակարգն օգտագործվում է քաղաքական նպատակներով»,-հայտարարել է Պսակին մամուլի ասուլիսում:

Պետդեպարտամենտի ներկայացուցչուհին նաև մեկնաբանել է Վրաստանի վարչապետի այն հայտարարությունը, որ երկրի արտաքին քաղաքական ուղեգիծը մնում է անփոփոխ և ուղղված է եվրաինտեգրմանն ու ժողովրդավարության զարգացմանը:

«Մենք լսեցինք վարչապետի մեկնաբանությունները, բայց փաստ է, որ նախկին բարձրաստիճան պաշտոնյաների և ընդդիմության նկատմամբ հետաքննությունը դարձյալ շարունակվում է: Կարծում եմ՝ այս դեպքում, գործողություններն ավելի խոսուն են, քան հայտարարությունները»,-նշել է Պսակին:

Պսակիի նախորդ հայտարարությունը հրապարակվել էր նախօրյակին: Դրանում նա նույնպես կոչ էր արել Վրաստանի իշխանություններին՝ միջոցներ ձեռնարկել՝ ցրելու այն կասկածները, որ դատական համակարգն օգտագործվում է քաղաքական նպատակներով», հաղորդել է «Նովոստի Գրուզիա»-ն: