Հայաստանի ֆոնդային բորսան ամրապնդում է իր տեղը ֆինանսական շուկայում

Հայաստանի ֆոնդային բորսայում բաժնետոմսերով և պետական պարտատոմսերով գործարքներն այս տարի աննախադեպ աճ են գրանցել: Տարվա ընթացքում իրականացվել է բաժենտոմսերի մոտավորապես 26 մլրդ դրամի գործարք, որը գերազանցում է նախորդ 10 տարիների գումարային ցուցանիշը, իսկ պետական պարտատոմսերի մասով իրականացվել է ավելի քան 20 մլրդ դրամի գործարք, որը նախորդ տարվա արդյունքի կրկնապատիկից ավելի է: «Արմենպրես»-ի հետ զրույցում «Նասդաք Արմենիա» ֆոնդային բորսայի տնօրեն Կոնստանտին Սարոյանն ամփոփեց 2014 թվականի ցուցանիշները' նշելով, որ թե՛ ծավալային և թե՛ ֆինանսական տեսանկյունից բոլոր գործարքներն աճել են: «Մենք տեսնում ենք, որ բորսան կայանում է, նորանոր ծառայություններ ենք մատուցում: Բորսայում իրականացվող ծրագրերը հիմնականում երկարաժամկետ են և դրանց արդյունքները շատ ավելի ուշ տեսանելի կլինեն, սակայն ներկայումս էլ պահպանվում են աճի տեմպերը բոլոր բաղադրիչների մասով»,- ասաց նա:

Թեև տարեվերջը բավականին դժվար ժամանակահատված եղավ ֆոնդային բորսայի համար արտարժույթի գործարքների առումով, քանի որ դրամի արժեզրկումից հետո բորսայական գործարքներն զգալի անկում ապրեցին, սակայն Սարոյանը նշեց, որ մինչև տարվա ավարտը հնարավոր է գերազանցել անցած տարվա ցուցանիշը: «Արտարժույթի մասով մենք առնվազն կհասնենք հաջորդ տարվա մակարդակին: Այստեղ լուրջ շեղում չենք նկատում, քանի որ կարծես թե դուրս ենք եկել մի օբյեկտիվ ծավալի, որից հետո գործարքների ծավալները կտրուկ աճ չեն գրանցում»,- նշեց «Նասդաք Արմենիայի» տնօրենը:

Կոնստանտին Սարոյանը 2014 թվականի ձեռբերումներից համարեց միջազգային Bloomberg և Reuters համակարգերում Հայաստանի տեսանելիության բարձրացումը: «Այնտեղ ստեղծվել է հայկական շուկայի էջ, որտեղ արտացոլվում է մեր մասին ինֆորմացիան: Clearstream համակարգում ևս մեր հաշիվն ակտիվ շրջանառվում է, դրանցում են հայկական եվրաբոնդերը, կենսաթոշակային ֆոնդերի կառավարիչների ներդրումները և այլն»,- ընդգծեց նա: Սարոյանը շեշտեց, որ թեև կենսաթոշակային համակարգի մասով եղան վայրիվերումներ, սակայն համակարգն աշխատում է: «Ֆոնդերի արժեքի աճը ակնհայտ է, դրանք միջինում 10 տոկոս աճ են ապահովում: Ինչքան էլ համակարգը քննադատվեց, ամեն դեպքում փաստն այն է, որ ֆոնդերի արժեքի աճ է նկատվում, ցավալին այն է, որ առայժմ մարդիկ չեն համարում այդ արդյունքն իրենցը, նրանք չեն մտածում, որ այնտեղ եղած փողն իրենցն է: Որպես ֆոնդի մասնակից ես հետևում եմ' ինչպես է աճում այն: Մյուս կողմից, Կենտրոնական դեպոզիտարիան' որպես պահառու, մանրակրկիտ կերպով հետևում է, թե ինչ արժեթղթերում են ներդրվում գումարները, որպեսզի ոչ մի շեղում չլինի: Ես ուրախ կլինեի, որ մարդիկ ևս հետևեին իրենց ֆոնդերին»,- ասաց նա:

Հայաստանի ֆոնդային բորսայի ղեկավարի խոսքով' հաջորդ տարվա գլխավոր անելիքներից պետք է լինի այն, որ պետական պարտատոմսերի աճուրդները սկսեն իրականացվել բորսայում: «Ֆինանսների նախարարության հետ ստեղծվող նոր հարթակը հետաքրքիր գործիք է: Այն հնարավորություն է տալիս ցանկացած ֆիզիկական անձի ձեռք բերել արժեթուղթ, ասենք, եթե նա ունի 10 կամ 50 հազար դրամ, և այդ գումարը չի ցանկանում որպես ավանդ ներդնել, կարող է օգտվել այս գործիքից: Այսինքն, այն որպես ներդրման գործիք շատ հարմար է: Պարտատոմսերը բավականին եկամտաբեր են: Մենք պետք է հասարակությանը կրթենք, որ ավանդից բացի կա նաև այլ գործիք, որը գուցե ավելի հարմար է»,- ասաց նա: Սարոյանը նշեց, որ այս համակարգի ներդրմամբ պարտատոմսերի մեծ ծավալի վաճառք չեն ակնկալում, սակայն այն կնպաստի դրանց տարածվելիությանը և հասանելիությանը:

«Նասդաք Արմենիան» ներկայումս Հայաստանում գործող միակ ֆոնդային բորսան է: Այն հանդիսանում է NASDAQ OMX Group, Inc. միջազգային խմբի մաս: Արդեն մոտ մի ամբողջ տասնամյակ է, ինչ ընկերությունը' հանդիսանալով Հայաստանի արժեթղթերի կազմակերպված շուկա, շուկայի մասնակիցներին է առաջարկում լիովին ավտոմատացված էլեկտրոնային առևտրային հարթակ: Ներկայումս «Նասդաք Արմենիայում» իրականացվում է բաժնետոմսերի, կորպորատիվ պարտատոմսերի, ՀՀ ֆինանսների նախարարության և ՀՀ կենտրոնական բանկի կողմից թողարկված պետական պարտատոմսերի, ՌԵՊՈ գործիքների, արտարժույթի, ինչպես նաև վարկային ռեսուրսների առևտուրը: