Ազգային երգուպարով Կասկադում կնշվի Բարեկենդանը. միացե´ք դիմակներով տոնական շքերթին

Արարատյան Հայրապետական թեմի երիտասարդները փորձում են վերականգնել ազգային տոները: Առաջնորդանիստ սուրբ Սարգիս եկեղեցուց փետրվարի 15-ին՝ ժամը 13.30-ին, Մաշտոցի պողոտայով դեպի Կասկադ համալիր կընթանա Բուն Բարեկենդանի դիմակներով շքերթը: Շքերթին կմասնակցեն թեմի երիտասարդները, բուհերի ուսանողներ, Երևանի վարչական շրջաններից պարի և դհոլահարների խմբեր, ազգագրական երգուպարի խմբեր՝ «Մարաթուկ», «Վան», «Կարին», «Նուբար», «Վերադարձ», «Ակունք», «Ազգային տոների վերածնունդ» ՀԿ, Հայորդաց տան համախմբեր, հեքիաթի հերոսներ, ծաղրածուներ և այլք:

Ինչպես «Արմենպրես»-ին տեղեկացրին Արարատյան Հայրապետական թեմի տեղեկատվական բաժնից, Կասկադ համալիրում օրը հագեցած կլինի ագզային երգ ու պարով, սուրբ Սարգսի տոնին նվիրված նկարների ու քանդակների ցուցահանդեսով, թատերական ներկայացումներով, խաղերով, մրցույթներով ու մրցանակներով:

Թեմի երիտասարդները շքերթի ընթացքում ու Կասկադ համալիրում կհյուրասիրեն բարեկենդանյան ավանդական ուտեստներ:

Բուն Բարեկենդանի մեծ տոնախմբությունը թեմի երիտասարդներն ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոսի օրհնությամբ ու աջակցությամբ արդեն երկրորդ տարին է կազմակերպում են մեծ շուքով ու մարդաշատ տոնախմբությամբ: