Դատախազի տեղակալն ապօրինաբար միջամտել է դատարանի գործունեությանը

Փաստաբան Շարբաթյանի մահվան գործում առկա երկու՝ դատաբժշկական և հանձնաժողովային դատաբժշկական փորձաքննության եզրակացություններից բացի՝ մեղադրողի միջնորդության հիման վրա դատարանի որոշմամբ նշանակվել է լրացուցիչ հանձնաժողովային դատաբժշկական փորձաքննություն: Չնայած մեղադրողի միջնորդությանը՝ դատարանը մերժել էր այդ փորձաքննությանը հանձնաժողովային փորձաքննությունն իրականացրած փորձագետներ՝ Ա. Հովսեփյանի, Հ. Չախոյանի և Խ. Ստեփանյանի մասնակցությունը՝ հաշվի առնելով նրանց միջև առկա տարաձայնությունները, ինչպես նաև պաշտպանական կողմի մտահոգությունները՝ նրանց այդ փորձաքննության կատարումից անպայման զերծ պահելու վերաբերյալ: Դատարանի որշումն ուղեկցական գրությամբ ուղարկել էր առողջապահության նախարարին, որն էլ իր հրամանով հաստատել էր լրացուցիչ դատաբժշկական հանձնաժողովային փորձաքննությունն իրականացնող հանձնաժողովի կազմը՝ Գ. Հարությունյանի, Ռ. Ֆանարջյանի և Մ. Եղունյանի մասնակցությամբ: Վերջիններս դատարանի որոշմամբ ճանաչվել էին փորձագետներ, որոնց վերաբերյալ բացարկ չէին հայտնել նաև մեղադրողները: Եվ մինչ կողմերն սպասում էին փորձաքննության կատարմանը, դատախազությունն ապօրինաբար միջամտում է դատարանի գործունեությանը: ՀՀ դատախազի տեղակալ Է. Բաբայանի միջնորդագրի հիման վրա լրացում կատարելով առողջապահության նախարարի՝ փորձաքննությունն իրականացնող հանձնաժողովի կազմը հաստատելու մասին արդեն կայացրած հրամանի մեջ՝ վերը նշված փորձագետներ՝ Ա. Հովսեփյանը, Հ. Չախոյանն ու Խ. Ստեփանյանը, որոնց մասնակցությունն արգելվել էր դատարանի որոշմամբ, դարձյալ ընդգրկվել են հանձնաժողովի կազմում:

Ամբաստանյալներ Սամվել Դիլոյանի և Արեն Վերանյանի շահերի պաշտպան Ռուբեն Հակոբյանը բացարկ է հայտնել դատարանի որոշման պահանջների ակնհայտ խախտումով, գլխավոր դատախազի տեղակալ Է. Բաբայանի ապօրինի միջնորդագրի հիման վրա հանձնաժողովի կազմում լրացուցիչ ընդգրկված փորձագետներ Ա. Հովսեփյանին, Հ. Չախոյանին և Խ. Ստեփանյանին: Միաժամանակ փաստաբանը խնդրել է Դատարանին՝ քննարկել դատարանի գործունեությանը (փորձաքննություն նշանակելու և կատարելու գործընթացին) գլխավոր դատախազի տեղակալ Է. Բաբայանի' օրենքով չնախատեսված վերը նշված միջամտությունը և այդ մասին հայտնել Դատավորների ընդհանուր ժողովի էթիկայի և կարգապահական հարցերի հանձնաժողովին՝ դիմելու համապատասխան մարմիններին' մեղավոր պաշտոնատար անձին կամ անձանց պատասխանատվության ենթարկելու միջնորդությամբ:

«Մենք գործ ունենք դատախազներ-փորձագետներ՝ սերտ համագործակցող կոալիցիայի հետ, ովքեր համագործակցում են ընդդեմ ճշմարտության բացահայտման և հանուն ապօրինի մեղադրանքն ամեն գնով, «ուժի զոռով» առաջ տանելուն: Արդյո՞ք ՀՀ գլխավոր դատախազի տեղակալ Է. Բաբայանը, ով միջնորդագրով դիմել է առողջապահության նախարարաին և խնդրել նշված երեք փորձագետներին ընդգրկել հանձնաժողովի կազմում, չի իմացել, որ ինքը չի հանդիսանում այդ քրեական գործով մեղադրանքը պաշտպանած և պաշտպանող հինգ դատախազներից մեկը, և չի կարող համարվել այդ գործով մեղադրող: Չի իմացե՞լ, որ ինքը ՀՀ քրեական դատավարության օրենսգրքով կամ դատախազության մասին օրենքով սահմանված կարգով իրավասու չի եղել այդ քրեական գործով իրականացնել մեղադրանքի պաշտպանությանն ուղղված որևէ դատավարական գործողություն կամ այդ կապակցությամբ իրականացնել դատավարական որևէ լիազորություն, մասնավորապես, որ չի կարող հիշյալ քրեական գործով փորձագիտական հանձնաժողովի կազմը փոփոխելու մասին միջնորդագիր ներկայացնել առողջապահության նախարարին:

Արդյո՞ք նա չի իմացել, որ քրեական գործը մեղադրական եզրակացությամբ Դատարան ուղարկելուց հետո, դատաքննության փուլում մեղադրանքի պաշտպանությանն ուղղված ցանկացած գործողություն պետք է կատարվի, ցանկացած միջնորդություն, դիմում, պետք է քննարկվի Դատարանում' հրապարակային, կողմերի մասնակցությամբ, և որ արտադատական կարգով որևէ գործողություն իրականացնելն անթույլատրելի է: Արդյո՞ք նա չի իմացել, որ մեղադրողի' լրացուցիչ հանձնաժողովային դատաբժշկական փորձաքննություն նշանակելու և դրա կատարումը նույն փորձագիտական հիմնարկի փորձագետներին հանձնարարելու մասին միջնորդությունը Դատարանում արդեն իսկ քննարկվել է, իսկ Դատարանն էլ որոշում է կայացրել այլ փորձագետների հանձնարարելու մասին: Արդյո՞ք նա չի իմացել, որ դատախազը պարտավոր է հարգել Դատարանի անկախությունն ու անկողմնակալությունը և մասնավորապես չպետք է իր գործողություններով կասկածի տակ դնի դատական ակտի օրինականությունը կամ խոչընդոտի դրա կատարմանը, բացառությամբ դատական ակտի բողոքարկման իր իրավունքն իրագործելիս (ՀՀ դատական օրենսգրքի 6-րդ հոդված, 3-րդ մաս), արդյո՞ք չի իմացել, որ դատավորի գործունեությանը օրենքով չնախատեսված միջամտությունն արգելվում է և նման արարքը քրեորեն հետապնդելի է (ՀՀ դատական օրենսգրքի 11-րդ հոդված, 3-րդ մաս, ՀՀ ՔԴՕ 24-րդ հոդված, մաս 3-րդ), պետական ծառայողների համար այն առաջացնում է նաև կարգապահական պատասխանատվություն՝ ընդհուպ մինչև զբաղեցրած պաշտոնից կամ ծառայությունից ազատում' պետական ծառայությունը կարգավորող համապատասխան օրենքներով սահմանված կարգով: ՀՀ քրեական օրենսգրքի 332-րդ հոդվածի 1-ին մասը քրեական պատասխանատվություն է առաջացնում արդարադատության իրականացմանը խոչընդոտելու նպատակով դատարանի գործունեությանը ցանկացած ձևով միջամտելու համար»,-նշված է դատարան ներկայացված միջնորդության մեջ»:

Բացարկի միջնորդության վերաբերյալ դատարանի որոշումը կհրապարակվի վաղը՝ Վանաձորի դատարանում: