Մարկո Ռուբիոն ԱՄՆ նախագահ ընտրվելու դեպքում պատրաստ է Իրանի դեմ ռազմական գործողությունների

Սենատոր Մարկո Ռուբիոն (հանրապետական, Ֆլորիդա նահանգից) 2016-ի ԱՄՆ նախագահական ընտրություններում հաղթելու դեպքում պատրաստ կլինի ռազմական ուժ կիրառել Իրանի դեմ՝ միջուկային զենքի ձեռք բերում թույլ չտալու համար: Այս մասին նա հայտարարել է կիրակի CBS հեռուստաընկերության եթերում, փոխանցում է ՏԱՍՍ գործակալությունը:

43-ամյա Ռուբիոն կասկած է հայտնել այն առնչությամբ, որ Իրանի հետ «վեցյակի» ներկայիս բանակցությունները, որոնք կոչված են կարգավորելու Թեհրանի միջուկային խնդիրը, կավարտվեն պայմանավորվածությունների ձեռքբերմամբ։ «Չեմ կարծում, թե դրանք հաջողությամբ կպսակվեն»,- ասել է օրենսդիրը, ով անցած շաբաթ պաշտոնապես հայտարարել է ԱՄՆ նախագահի պաշտոնի համար պայքարելու մտադրության մասին:

Նա հայտարարել է, որ Վաշինգտոնը պետք է Թեհրանի համար հստակ սահմաններ գծի միջուկային մշակումների պլանում և նախազգուշացնի Իրանին, որ այդ սահմանն անցնելու դեպքում կհաջորդեն ԱՄՆ-ի ռազմական գործողությունները։ «Մենք չենք ցանկանում, որ դա տեղի ունենա, սակայն միջուկային Իրանի ի հայտ գալու ռիսկն այնքան մեծ է, որ այդ տարբերակը չի կարելի բացառել»,- նշել է Ռուբիոն:

Նրա կանխատեսմամբ՝ եթե Իրանի դեմ ռազմական գործողությունները չսանձազերծի ԱՄՆ-ն, դա կանեն ուրիշները՝ Սաուդյան Արաբիան և Իսրայելը:

Նա քննադատել է Օբամայի կուրսը: «Այսօր մեր դաշնակիցները մեզ ավելի քիչ են վստահում: Մեր թշնամիներն ավելի քիչ են վախենում: Ամերիկան ունի ավելի քիչ ազդեցություն համաշխարհային գործերում, քան 6 տարի առաջ»:

Մինուսների շարքում է դասել նա նաև Ռուսաստանի հետ հարաբերությունների նախկին վերբեռնումը: Նա հերթական անգամ ԱՄՆ կառավարությանը կոչ է արել Ռուսաստանի հանդեպ շատ ավելի կոշտ գործել: