«Ռոսֆինմոնիտորինգը» բանկային պատժամիջոցներ է սահմանում Արևմուտքի դեմ

Բանկերը պետք է «Ռոսֆինմոնիթորինգին» իրազեկեն այն ֆիզիկական անձանց և ընկերությունների գործառնությունների մասին, որոնք Ռուսաստանի դեմ պատժամիջոցներ սահմանած երկրների ռեզիդենտներ են: Այդ մասին, ինչպես տեղեկացնում է «Արմենպրես»-ը, հաղորդել է «Իզվեստիա» թերթը՝ վկայակոչելով գերատեսչության կողմից բանկեր ուղարկված նամակը:

Ըստ թերթի տեղեկատվության՝ նորացված ցուցակում, որտեղ նաև ներառվել են այն երկրները, որոնք օժանդակում են ահաբեկչությանը, թմրավաճառությանը կամ պայքար չեն մղում կոռուպցիայի դեմ, մտել է ավելի քան 40 պետություն. ԱՄՆ-ը, Կանադան, Եվրամիությունը (ներառում է 28 պետություն), Ավստրալիան, Նորվեգիան, Իրանը, Սիրիան, Սուդանը, Նոր Զելանդիան, Արգենտինան, Մեքսիկան, Շվեյցարիան, Հյուսիսային Կորեան և Ճամայկան:

Գերատեսչությանը մոտ կանգնած աղբյուրի տվյալներով՝ նորացված ցուցակը կազմվել է «աշխարհում և Ռուսաստանում ընթացիկ քաղաքական և տնտեսական իրադրությանը համապատասխան»: «Ռոսֆինմոնիթորինգի» պահանջի համաձայն՝ բանկերը հաճախորդին սպասարկման ընդունելիս պետք է պարզեն, թե նա սև ցուցակի պետության ռազիդենտ է արդյոք:

Թերթի տվյալներով՝ նամակում բացատրված է, որ ցուցակը ներառում է այն երկրները, որոնց նկատմամբ ՌԴ-ն պատժամիջոցներ է սահմանել ի պատասխան դրանց կողմից սկզբնապես սահմանված պատժամիջոցների, հաղորդել է ՌԻԱ «Նովոստին»:

Լուսանկարը' Fotolia/ Denys Prykhodov