Աշխարհում մեկ տարում դեն են նետել 300 տոննա ոսկի

Անցյալ տարի ամբողջ աշխարհում դեն են նետել շուրջ 41,8 մլն տոննա էլեկտրոնային և էլեկտրական սարքավորումներ: Այդ մասին վկայում է ՄԱԿ-ի համալսարանի զեկույցը, հաղորդում է «Արմենպրես»-ը՝ հղում անելով «Ֆրանսպրես» գործակալությանը:

Ըստ մասնագետների հաշվարկների՝ այս քանակությամբ աղբը կարելի էր տեղավորել 1,15 մլն բեռնատարների մեջ, որոնք կարող էին 23 հազար կիոմետրանոց շղթա կազմել: Երկրորդային օգտագործման նպատակով վերամշակման համար պիտանի թափոնների, ինչպես նաև այն նյութերի արժեքը, որոնք կարող են կորզվել թափոններից, կազմում է 52 մլրդ դոլար:

Օրինակ, դեն նետված ամբողջ աղբը պարունակել է 300 տոննա ոսկի. դա կազմում է 2013 թվականին այդ թանկարժեք մետաղի համաշխարհային արտադրության 11 տոկոսը: Բացի այդ, թափոններում գտել են 2,2 մլն տոննա նյութեր, որոնք պարունակում են կապար, ինչպես նաև՝ սնդիկ, կադմիում և քրոմ:

«Էլեկտրանային աղբի» շուրջ 60 տոկոսը սառնարաններն են, լվացքի մեքենաները և կենցաղային այլ տեխնիկա: Բջջային հեռախոսներին, հաշվիչներին, համակարգիչներին ու տպիչներին բաժին է ընկնում այդ աղբի ամբողջ ծավալի ընդամենը 7 տոկոսը:

Բնակչության մեկ շնչի հաշվով «Էլեկտրոնայն աղբի» արտադրության մեջ առավել էական «ավանդ» են ներդնում էկոլոգիական պատասխանատվության բարձր մակարդակով երկրները: Օրինակ՝ Նորվեգիայում 2014 թվականին մեկ մարդուն բաժին են ընկնում 28,4 կգ, Շվեյցարիայում՝ 26,3, Իսլանդիայում՝ 26,1. Դանիայում՝ 24, Մեծ Բրիտանիայում՝ 23,5 կիլոգրամ էլեկտրոնային թափոններ: Ամենացածր ցուցանիշները նշվել են Աֆրիկայում՝ բնակչության մեկ շնչի հաշվով՝ 1,7 կիլոգրամ (ամբողջ մայրցամաքում կուտակվել է 1,9 մլն տոննա աղբ):

«Առաջատարներ» են դարձել ԱՄՆ-ը և Չինաստանը (բոլոր թափոնների 32 տոկոսը): Նրանց հաջորդում են Ճապոնիան, Գերմանիան և Հնդկաստանը: 2013 թվականին ամբողջ աշխարհում «Էլեկտրոնային թափոնները» կազմել են 39,8 մլն տոննա: Կանխատեսվում է, որ 2018-ին այդ ցուցանիշը կհասնի 50 մլն տոննայի:

Լուսանկարը՝ AP