ԵՄ Խորհուրդը Եվրահանձնաժողովին խնդրում է առաջարկներ ներկայացնել ԵՄ հարևանության քաղաքականության բարեփոխման վերաբերյալ

Երկուշաբթի օրը Լյուքսեմբուրգում անցկացվող հանդիպմանը ԵՄ անդամ երկրների ԱԳՆ ղեկավարների խորհուրդը Եվրահանձնաժողովին և ԵՄ դիվանագիտության ղեկավար Ֆեդերիկա Մոգերինիին կոչ է արել մինչև 2015թ. աշուն առաջարկներ ներկայացնել Եվրոպական հարևանության քաղաքականության բարեփոխման վերաբերյալ: Այս մասին ասվում է Եվրոպական հարևանության քաղաքականության հարցերով խորհրդի եզրակացություններում` փոխանցում է ՌԻԱ Նովոստին:

«Խորհուրդը Բարձր ներկայացուցչին և Եվրահանձնաժողովին խնդրում է մինչև 2015թ. աշուն բարեփոխման վերաբերյալ առաջարկներ ներկայացնել խորհրդի քննարկմանը»,- ասվում է փաստաթղթում:

ԵՄ-ն մինչև հունիսի վերջ` կապված տարածաշրջանում փոփոխությունների հետ, հարևանության քաղաքականության ապագայի վերաբերյալ խորհրդակցություններ կանցկացնի ԵՄ ներսում անդամ երկրների հետ, ինչպես նաև գործընկերների հետ`  մարտի սկզբին հայտնել է Եվրահանձնաժողովը: Եվրահանձնակատար Յոհաննես Հանն այն ժամանակ էլ ասել է, որ ԵՄ-ն ուզում է զարգացնել աշխատանքը էներգետիկ անվտանգության ոլորտում Եվրոպական հարևանության քաղաքականության մասնակից երկրների հետ:

«Խորհուրդն ընդգծում է (քաղաքականության) արդյունավետության բարձրացման և դրա անհատական մոտեցման համար դրա վերանայման գործընթացին Եվրոպական հարևանության քաղաքականության գործընկերների մասնակցությունն ապահովելու անհրաժեշտությունը»,- նշվում է եզրակացություններում: