Սիդնեյում փոթորիկն առանց էլեկտրականության է թողել ավելի քան 130 հազար տուն

Սիդնեյում և ափամերձ քաղաքներում ուժգին փոթորկի պատճառով առանց էլեկտրականության է մնացել ավելի քան 130 հազար տուն: Ինչպես ապրիլի 21-ին հայտնել են օդերևութաբանական ծառայության ներկայացուցիչները, անցած գիշեր քամու պոռթկումների արագությունը հասել է վայրկյանում 37,5 մետրի: Մի շարք շրջաններում տեղատարափ անձրևները հանգեցրել են հեղեղումներ:

Ավստրալիայի՝ շուրջ 4,8 մլն բնակչություն ունեցող խոշորագույն քաղաքի փողոցներում ընկած են տապալված ծառեր, բազմաթիվ ավտոմայրուղիներում արգելափակված է երթևեկությունը: Քաղաքի իշխանություններն անբարենպաստ եղանակի պատճառով փակել են դպրոցների մեծ մասը, չեն աշխատում բազմաթիվ խանութներ: Փրկարարները հայտնել են, որ անցած գիշեր ընդունել են օգնության ավելի քան 2,8 հազար հեռախոսազանգ: Հիմնականում մարդիկ հայտնել են իրենց տների վրա ընկած ծառերի, էլեկտրականության բացակայության, քամուց պոկված տանիքների մասին:

Պոռթկուն քամու և տեղատարափ անձրևների պատճառով Սիդնեյում և նրա արվարձաններում փակվել է լաստանավային և երկաթուղային հաղորդակցությունը: Քաղաքի օդանավակայանն աշխատանքը շարունակում է առանց էական փոփոխությունների:

Ինչպես հայտնել են օդերևութաբանները, ապրիլի 20-ը Սիդնեյում ամենաանձրևոտ օրն է դարձել վերջին 13 տարվա ընթացքում. քաղաքում 119 միլիմետր տեղումներ են գրանցվել: Ընթացիկ ամիսն արդեն ամենաանձրևոտ ապրիլն է ճանաչվել վերջին 17 տարվա ընթացքում, հաղորդել է ՏԱՍՍ-ը: