Ճապոնական գնացքը սահմանել է արագության նոր համաշխարհային ռեկորդ՝ ժամում 603 կիլոմետր

Մագնիսական բարձով գնացքի (մագլև) մշակման հաջորդ փուլը կդառնա դրա շարժման կայունության ու անվտանգության բարձրացումը: Այս մասին, ինչպես տեղեկացնում է «Արմենպրես»-ը, ապրիլի 21-ին ՏԱՍՍ-ին հայտարարել է JR Tokai երկաթուղային ընկերության ներկայացուցիչն այն բանից հետո, երբ Յամանասիի լեռնային պրեֆեկտուրայում ընկերության 42-կիլոմետրանոց թեստային գծում սահմանվել է արագության նոր համաշխարհային ռեկորդ՝ ժամում 603 կիլոմետր:

Նախորդ ռեկորդը՝ ժամում 590 կիլոմետր, սահմանվել էր ապրիլի 16-ին:

2011 թվականին Ճապոնիայի իշխանությունները հավանություն են տվել Տոկիոյի և Հոնսյու կղզու կենտրոնական մասի Նագոյա խոշոր քաղաքի միջև 286 կիլոմետր երկարությամբ մագնիսական բարձով գնացքների առաջին առևտրային գծի կառուցման պլանին: Դրա շինարարությունն սկսվել է անցյալ տարի և կավարտվի 2027 թվականին: Նախագծի արժեքը գնահատվում է 5,5 տրիլիոն իեն (45,8 միլիարդ դոլար): Մինչև 2045 թվականն ուղեգիծը ենթադրվում է երկարացնել մինչև Օսակա՝ կարևոր տնտեսական կենտրոն Հոնսյու կղզու հարավ - արևմուտքում:

Մագնիսական բարձով ճեպընթացը Տոկիոյի և Նագոյայի միջև հեռավորությունը կհաղթահարի 40 րոպեում՝ ժամում 500 կիլոմետր միջին արագությամբ:

Լուսանկարը՝ EPA