Մերկելը վախենում է «ցեղասպանություն» եզրը գործածելուց. dpa

Գերմանիայի կանցլեր Անգելա Մերկելն աջակցում է Հայոց ցեղասպանության վերաբերյալ «ցեղասպանություն» եզրի օգտագործման դիրքորոշմանը: Միևնույն ժամանակ, Մերկելը վախենում է, որ Բեռլինի կողմից այդ եզրի օգտագործումը կարող է բացասաբար անդրադառնալ Հայաստանի և Թուրքիայի հաշտեցման գործընթացի վրա: Այս մասին Մերկելը հայտարարել է ապրիլի 21-ին Քրիստոնյա դեմոկրատների և քրիստոնյա սոցիալիստների խմբակցության նիստի ժամանակ, հայտնում է dpa գործակալությունը՝ հղում անելով հանդիպման մասնակիցներին:

Քրիստոնյա դեմոկրատների և քրիստոնյա սոցիալիստների խմբակցությունը և Գերմանիայի Սոցիալ-դեմոկրատական կուսակցությւոնը ծրագրում են ապրիլի 24-ին Հայոց ցեղասպանության 100-րդ տարելիցի հետ կապված բանաձև ընդունել, որում Մեծ եղեռնի մասին հետևյալն է ասվում. «Ձեր ճակատագիրն օրինակ է զանգվածային ոչնչացումների, էթնիկ զտումների, հետապնդումների, նույնիսկ ցեղասպանությունների պատմությունից, որոնցով սարսափելիորեն նշվել է 20-րդ դարը»: Այդպիսով իշխող կոալիցիան կապում է հայերի ճակատագիրն ու «ցեղասպանություն» հասկացությունները՝ միաժամանակ Հայոց ցեղասպանությունն ուղղակիորեն չբնութագրելով այդ եզրով, եզրափակում է dpa-ն: