Աշխարհը պետք է միավորվի ծայրահեղականության դեմ պայքարում. ՄԱԿ-ի գլխավոր քարտուղար

Համաշխարհային հանրությունը պետք է միավորվի ծայրահեղականության դեմ մղվող պայքարում և վերացնի այն ծնող պատճառները: Նման կոչով ապրիլի 22-ին հանդես է եկել ՄԱԿ-ի գլխավոր քարտուղար Պան Գի Մունը՝ ամփոփելով ծայրահեղականությանը հակազդելու և հանդուրժողության խրախուսման հարցերին նվիրված երկօրյա համաժողովի արդյունքները, որն անցկացվել է համաշխարհային կազմակերպության կենտրոնակայանում:

«Աշխարհը պետք է միավորվի ծայրահեղականության դեմ: Մենք նաև պետք է վերացնենք այն, ինչը սնում է դրան»,- ասել է ՄԱԿ-ի վարչական ղեկավարը:

Երկու օրվա ընթացքում ՄԱԿ-ի անդամ երկրների ներկայացուցիչները, ինչպես նաև կրոնական առաջնորդները կարծիքներ էին փոխանակում ծայրահեղականության աննախադեպ ալիքի շուրջ, որն ընդգրկել է Մերձավոր Արևելքի և Հյուսիսային Աֆրիկայի երկրները:

«Ամբողջ աշխարհում մարդիկ ցնցված են ահաբեկիչների բարբարոսական գործողություններից: Չնայած, նրանք պնդում են, որ առաջնորդվում են իրենց հավատով, նրանց գաղափարախոսությունը հակասում է հիմնական կրոններից յուրաքանչյուրի ուսմունքին»,- ընդգծել է Պան Գի Մունը:

Նա վստահություն է հայտնել, որ հոգևոր առաջնորդները կարող են գլխավոր դերը խաղալ միջկրոնական հակասությունների հաղթահարման գործում, ինչպես նաև հակահարված տալ արմատական ուժերին: Այդ նպատակով ՄԱԿ-ի ղեկավարը մտադիր է հանձնաժողով կազմել կրոնական գործիչներից, որը կօգնի միջազգային հանրակցությանը`ժամանակին արձագանքել տեղի ունեցող իրադարձություններին:

Բացի այդ, Պան Գի Մունը պատրաստում է ծայրահեղականության դեմ պայքարի գործողությունների համապարփակ ծրագիր, որը մտադիր է Գլխավոր ասամբլեային ներկայացնել մինչև տարեվերջ: