Իվանիշվիլիի քմահաճություններն անհարմար վիճակի մեջ են դնում Վրաստանին. Բուրջանաձե

«Վրացական երազանք» իշխող կոալիցիայի հիմնադիր, նախկին վարչապետ Բիձինա Իվանիշվիլիի քմահաճություններն անհարմար վիճակի մեջ են դնում ոչ միայն նրան, այլև Վրաստանին: Այդ մասին, ինչպես տեղեկացնում է «Արմենպրես»-ը, հղում անելով «Նովոստի Գրուզիա»-ին, հայտարարել է հանրապետության խորհրդարանի նախկին խոսնակ, «Միավորված ժողովրդավարական շարժում» կազմակերպության առաջնորդ Նինո Բուրջանաձեն:

Այն բանից հետո, երբ ապրիլի 20-ին հայտարարվեց, որ շահագործման է հանձնվել Թբիլիսիի Ատոնելի փողոցում գտնվող պետական նստավայրը, վերստին օրակարգի հարց դարձավ այն, թե արդյոք նախագահ Գեորգի Մարգվելաշվիլին պետք է այնտեղ տեղափոխվի Հավլաբարի նստավայրից, որը կառուցվել է Միխեիլ Սահակաշվիլիի նախագահության օրոք: Բիձինա Իվանիշվիլին խորհուրդ է տվել Մարգվելաշվիլիին՝ հավաքել իրերը և տեղափոխվել Ատոնելի: Նրա խոսքով՝ Վրաստանը չի կարող իրեն այնպիսի շռայլություն թույլ տալ, որ 10 հազար քառակուսի մետր մակերեսով շենքը «պարապուրդի մատնվի»:

«Այն միանգամայն անհասկանալի իրավիճակում, որում հայտնվել են իշխանության բոլոր ճյուղերը, Մարգվելաշվիլին, իրոք, դրսևորեց մեծ սկբունքայնություն, երբ որոշեց հաշվի չառնել Բիձինա Իվանիշվիլիի և նրա զինակիցների պահանջը: Սակայն ավելի լավ կլիներ, եթե Մարգվելաշվիլին սկզբունքայնություն դրսևորեր ոչ միայն այդ հարցում, այլև այնպիսի կարևոր հարցերում, որոնք վերաբերում են երկրի ներքին ու արտաքին քաղաքականությանը: Ինչ վերաբերում է Իվանիշվիլիին, ապա նորմալ երկրում անհասկանալի կլիներ, թե ինչու են նրա դիրքորոշմանը հսկայական նշանակություն տալիս»,- հայտարարել է Բուրջանաձեն և հավելել, որ պետական ինստիտուտները քայքայող և երկրի շահերին վնասող դիմակայությունը Իվանիշվիլիի վաստակն է:

Գեորգի Մարգվելաշվիլին հայտարարել է, որ նախագահական պալատից նոր նստավայր իր վարչակազմի տեղափոխման թեմայի ակտիվացումը քաղաքական բնույթ է կրում, և գլխավոր պատճառը անձնական դիմակայությունն է իր և «Վրացական երազանք» կառավարող կոալիցիայի հիմնադիր Բիձինա Իվանիշվիլիի միջև:

Մարգվելաշվիլին 2013 թվականին պաշտոնն ստանձնելուց հետո հայտարարել է, թե մտադիր է աշխատել այն նստավայրում, որը կառուցվել է նախկին նախագահ Միխեիլ Սահակաշվիլիի կողմից (Հավլաբարի համալիրը): Այն ժամանակ նա իր համար աշխատանքային կաբինետ ընտրեց կառավարական դիվանատան շենքում: Մարգվելաշվիլին հանդես եկավ Հավլաբարի համալիրը վրաց-ամերիկյան համալսարանին հանձնելու նախաձեռնությամբ, իսկ ինքը պետք է տեղափոխվեր Ատոնելի փողոցում գտնվող նոր նստավայր: Չնայած դրան, Մարգվելաշվիլին 2014 թվականի մարտին, այնուամենայնիվ, տեղափոխվեց Հավլաբար: Այդ որոշման պատճառով Իվանիշվիլին քանիցս բացահայտորեն քննադատել է պետության ղեկավարին:

«Այդ թեման կապված չէ ոչ քառակուսի մետրերի, ոչ էլ բնակ-կոմունալ հարցերի հետ: Դա քաղաքական թեմա է: Ցավոք, պարոն Բիձինայի համար անընդունելի է, ոչ ես ինքս եմ որոշումներ ընդունում իմ նստավայրի և իմ գործունեության վերաբերյալ: Բնականաբար, Վրաստանին հարկավոր չէ այնպիսի նախագահ, որը կենթարկվի ճնշմանը և ցուցումով կլքի շենքը: Որպես նախագահ ես պարտավոր եմ չանել դա և պաշտպանել ինստիտուտի պատիվը: Դրանում չկա ոչ մեկի շահը, դա անձնական դիմակայությունն է իմ և Բիձինայի միջև»,- հայտարարել է Մարգվելաշվիլին: