Լուկաշենկոն ամաչում է, որ չի եղել «առասպելական երկրում»՝ Վրաստանում

Բելառուսի նախագահ Ալեքսանդր Լուկաշենկոն Վրաստանի իր պաշտոնակից Գեորգի Մարգվելաշվիլիի հետ ապրիլի 23-ին Թբիլիսիի նախագահական պալատում կայացած հանդիպմանը Վրաստանը համարել է առասպելական երկիր:

«Թանկագին Գեորգի, մենք վաղուց պետք է հանդիպեինք այստեղ, այս առասպելական քաղաքում, այս առասպելական երկրում: Ես արդեն երեկ ասել եմ, որ համոթ ինձ, ես չեմ եղել Թբիլիսիում, փաստորեն չեմ եղել Վրաստանում, բացառությամբ Սուխումի՝ խորհրդային ժամանակներում»,- ասել է Լուկաշենկոն, տեղեկացնում է «Արմենպրես»-ը՝ հղում անելով «Նովոստի Գրուզիա»-ին:

Բելառուսի նախագահը երկօրյա պետական այցով Թբիլիսի է ժամանել ապրիլի 22-ի երեկոյան: Նախագահի հետ բանակցություններից հետո պլանավորված են նրա հանդիպումները Վրաստանի վարչապետ Իրակլի Ղարիբաշվիլիի և Համայն Վրաստանի կաթողիկոս պատրիարք Իլյա Երկրորդի հետ:

Ապրիլի 24-ին ծրագրված է Լուկաշենկոյի ուղևորությունը Բաթում, որտեղ նա հանդիպում կունենա Աջարիայի Ինքնավար Հանրապետության կառավարության ղեկավար Արչիլ Խաբաձեի հետ, կդիտի տեղի ձեռնարկությունները, ինչպես նաև կայցելի համերգ: Բացի այդ, Լուկաշենկոն ներկա կգտնվի Բաթումի և Բրեստի եղբայրացման մասին պայմանագրի ստորագրման արարողությանը:

Բելառուսի նախագահը Վրաստանից կմեկնի ապրիլի 24-ին: