Չիտայում տուֆե խաչքար են կանգնեցրել ի հիշատակ հայոց ցեղասպանության
Ռուսաստան
Չիտայում ի հիշատակ Օսմանյան կայսրությունում հայոց ցեղասպանության 100-րդ տարելիցի կանգնեցրել և օծել են երեքմետրանոց տուֆե խաչքար, տեղեկացնում է «Արմենպրես»-ը:
«Խաչքարը քարե կոթող է՝ խաչի փորագրված պատկերով: Ձեռակերտ հուշարձանը բերվել է Հայաստանից: Դրա երկու կողմերին գտնվում են հուշատախտակներ. մեկը խորհրդանշում է ռուս և հայ ժողովուրդների բազմադարյա բարեկամությունը, երկրորդը նվիրված է անդրբայկալցի կազակներին, որոնք 1915 թվականին պաշտպան կանգնեցին հայերին»,- ՏԱՍՍ-ին ասել է «Անդրբայկալի հայերի միության» նախագահ Վլադիմիր Մարկոսյանը:
Խաչքարը տեղադրել են Ռուս ուղղափառ եկեղեցու տեղի թեմի մայր տաճարի տարածքում, այն օծել է Չիտայի և Պետրովսկ Զաբայկալսկի միտրոպոլիտ Վլադիմիրը: Արարողությանը եկել էին հարյուրավոր չիտացիներ, ներառյալ տարածաշրջանի ղեկավարները, հայ համայնքի, կազակների և կադետների ներկայացուցիչներ: Նրանք բռնել էին Ռուսաստանի և Հայաստանի դրոշները: Երկրամասի խորհրդարանի խոսնակ Նատալյա Ժդանովան հիշեցրել է, որ 100-ամյա վաղեմության իրադարձությունների հետևանքով զոհվել են ավելի քան 700 անդրբայկալցի կազակներ:
Արարարողությունն ավարտվել է հոգեհանգստի կարգով, որը միտրոպոլիտ Վլադիմիրը կատարել է Կազանյան Աստվածամոր սրբապատկերի մայր տաճարում:
ՈՒՂԻՂ ԵԹԵՐ
Ամենադիտված 
Ադրբեջանից ներմուծված բենզինը պետք է մնա բենզալցակայաններում, չպետք է օգտվեն դրանից (տեսանյութ)
