Նեպալի երկրաշարժից գրեթե մեկ միլիոն երեխա է տուժել. ՅՈՒՆԻՍԵՖ

Նեպալում տեղի ունեցած ավերիչ երկրաշարժից հետո հարյուր հազարավոր մարդիկ չունեն խմելու ջրից օգտվելու մշտական հնարավորություն և հարկադրված են ապրել պարուսինե ծածկերի կամ բաց երկնքի տակ. նրանց թվում կա շուրջ մեկ միլիոն երեխա: Այդ մասին, ինչպես տեղեկացնում է «Արմենպրես»-ը, հայտարարել է ՄԱԿ-ի Մանկական հիմնադրամի (ՅՈՒՆԻՍԵՖ) ներկայացուցիչ Քրիստոֆեր Թայդին:

«Այն, ինչ այժմ մենք գիտենք, այն է, որ տուժել է շուրջ մեկ միլիոն երեխա: Այս պահին մեր գլխավոր մտահոգությունը նրանց մաքուր ջրով և սանիտարական նորմալ պայմաններով ապահովելն է: Մենք գիտենք, որ ջուրը և ուտելիքն սպառվում են»,- Թայդիի խոսքը հաղորդել է Reuters գործակալությունը:

Այժմ հարյուր հազարավոր մարդիկ Նեպալում քնում են պարուսինե ծածկերի կամ բաց երկնքի տակ: Հիմնադրամի ներկայացուցչիները հայտնում են, որ իրենց փրկարարները հսկողություն են իրականացնում վարակների նկատմամբ, որոնք կարող են փոխանցվել ջրի միջոցով:

Ինչպես նշում է ՌԻԱ Նովոստին, որոնողա-փրկարարական գործողությանը մասնակցում են զինվորականները: Նրանց նաև միացել են օտարերկրյա փրկարարներ Չինաստանից, ԱՄՆ-ից, Կանադայից, Ավստրալիայից, Ճապոնիայից և Շրի Լանկայից: Ռուսաստանի արտակարգ իրավիճակների նախարարությունը Նեպալ է ուղարկել երկու ինքնաթիռ՝ փրկարարներով:

Առավել ուժգին ստորգետնյա ցնցումները Նեպալում գրանցվել են ապրիլի 25-ին. 7,9 մագնիտուդով առաջին երկրաշարժը տեղի է ունեցել տեղական ժամանակով ժամը 11:41-ին (Երևանի ժամանակով՝ ժամը 10:11-ին): Դրա էպիկենտրոնը գտնվել է մայրաքաղաք Կատմանդուից 80 կիլոմետր հյուսիս-արևմուտք ընկած շրջանում: 6,6 մագնիտուդով երկրորդ երկրաշարժը գրանցվել է տեղական ժամանակով ժամը 12:15-ին: Տարերքի օջախը գտնվում էր 10 կիլոմետր խորության վրա:

ՄԱԿ-ի արտակարգ իրավիճակների գնահատման և դրանց հակազդման կոորդինացման խմբի տվյալներով՝ ընդամենն աղետի գոտում հայտնվել է առնվազն 6,6 մլն բնակիչ:

Նեպալի Himalayan Times թերթը հաղորդել է, որ ավերիչ երկրաշարժի զոհերի թիվը երկրում կարող է հասնել 8 հազարի: