Կանադայում դինոզավրերի արահետ են հայտնաբերել

Կանադայում հայտնաբերել են դինոզավրերի հարյուրավոր հետքեր, որոնք թողնվել են, հավանաբար, ավելի քան 100 միլիոն տարի առաջ: Այս մասին, ինչպես տեղեկացնում է «Արմենպրես»-ը, հաղորդել է տեղական The Globe and Mail հրատարակությունը:

Հետքերը գտնվել են Բրիտանական Կոլումբիայի նահանգի հյուսիս-արևելքում՝ Ուիլիսթոն լճի մոտ՝ Վանկուվերից մոտավորապես 1500 կիլոմետր դեպի հյուսիս-արևելք ընկած շրջանում: Դրանք դրոշմված են քարքարոտ հողի վրա՝ մոտավորապես երեք ֆուտբոլային դաշտի չափ տարածքում, և կազմում են արահետ:

Հնէաբան Ռիչ ՄակՔրիի խոսքով՝ արահետի վրա կարելի է նկատել առնվազն 20 նախապատմական կենդանիների ոտքերի դրոշմներ: Մասնավորապես, այնտեղ ապրել են Ալոզավրեր՝ 8,5-մետրանոց երկոտանի գիշատիչներ, և խոտակեր անկիլոզավրեր, որոնք վեց տոննա քաշ ունեին:

ՄակՔրին հայտարարել է, որ «դինոզավրերի արահետը» կարող է դառնալ գիտական զբոսաշրջության ամենահանրաճանաչ վայրերից մեկը: Նա դիմել է տեղական կառավարությանը՝ տարածքը պաշտպանելու խնդրանքով՝ այն տեսարժան վայրի վերածելու համար: Ինչպես հիշեցրել է հնէաբանը, Չինաստանում դինոզավրերի Զիգոնգ թանգարան տարեկան յոթ միլիոն զբոսաշրջիկ է այցելում: