Նեպալում մասնավոր կլինիկաներին պարտավորեցրել են անվճար օգնություն ցույց տալ երկրաշարժից տուժածներին

Նեպալի կառավարությունը մասնավոր բժշկական կլինիկաների անձնակազմերին պարտավորեցրել Է անվճար բուժել այն մարդկանց, ովքեր տուժել են երկրաշարժից, այլապես հաստատությունը կարող Է զրկվել լիցենզիայից: Այդ մասին, ինչպես տեղեկացնում Է «Արմենպրես»-ը, ապրիլի 28-ին հաղորդել Է The Guardian-ը:

Երկրի ղեկավարությունն այդ քայլին Է դիմել այն բանից հետո, երբ մի քանի մասնավոր բուժհաստատություններում հրաժարվել են օգնել այն մարդկանց, ովքեր ի վիճակի չեն եղել վճարել բուժման դիմաց: Այսուհետև, եթե կլինիկան հրաժարվի անվճար օգնություն ցուցաբերել վիրավորներին, ապա նրանից հետ կվերցնեն լիցենզիան:

Ավելի վաղ Նեպալի վարչապետ Սուշիլ Կոյիրալան հայտարարել Է, որ երկրում երկրաշարժի զոհերի թիվը կարող Է հասնել 10 հազարի: Նրա խոսքով՝ Նեպալի իշխանությունները վրանների ու դեղորայքի կարիք ունեն: «Տուժածների ապաքինումը լուրջ խնդիր Է»,-նշել Է նա:

Կառավարության ղեկավարը հայտնել Է, որ ներկայում հաստատված Է 4349 մարդու զոհվելը, վնասվածքներ են ստացել ավելի քան 8 հազար բնակիչներ:

7,9 մագնիտուդով երկրաշարժը Նեպալում տեղի է ունեցել ապրիլի 25-ի առավոտյան: Դրա էպիկենտրոնը գտնվում էր երկրի մայրաքաղաք Կատմանդուից 82 կիլոմետր հյուսիս-արևմուտք ընկած շրջանում: Դրան հաջորդել են տասնյակ հետցնցումներ, որոնցից ամենահզորը՝ 6,7 մագնիտուդով, գրանցվել է ապրիլի 26-ին: Տեղի բնակիչները պատահածն արդեն համարել են ամենաավերիչը 1934 թվականից ի վեր, երբ զոհվել էր 8,5 հազար մարդ:

Նեպալի կառավարությունը եռօրյա սուգ Է հայտարարել ավերիչ երկրաշարժի զոհերի հիշատակին: Կառավարությունում նշել են, որ սահմանափակ ռեսուրսների պատճառով վիրավորների և զոհվածների որոնումներն ավելի շատ ժամանակ կպահանջի, քան սպասվում Էր ավելի վաղ, հաղորդել Է «Ինտերֆաքս»-ը: