Ֆրանսիան հումանիտար օգնությամբ երեք ինքնաթիռ է ուղարկում Նեպալ

Ֆրանսիան հումանիտար բեռներով, փրկարարներով ու բժիշկներով երեք ինքնաթիռ է ուղարկում երկրաշարժից տուժած Նեպալ: Այդ մասին, ինչպես տեղեկացնում է «Արմենպրես»-ը, հայտնել է Ֆրանսիայի արտաքին գործերի նախարար Լորան Ֆաբիուսը՝ ելույթ ունենալով ԱԳՆ-ի ճգնաժամային շտաբում:

Նրա տվյալներով՝ Airbus А340-ը, որը Փարիզից մեկնել էր ապրիլի 27-ին, տեխնիկական վայրէջք է կատարել Արաբական Միացյալ Էմիրություններում: Օդանավում գտնվում է շուրջ 100 մարդ, հիմնականում փրկարարներ ու բժիշկներ, ոչ կառավարական կազմակերպությունների աշխատողներ: Այն նաև փոխադրում է մոտավորապես 20 տոննա հումանիտար բեռներ: Վերադառնալիս ինքնաթիռը Կատմանդուից Ֆրանսիա կբերի տուժածների, ինչպես նաև երեխաներով ընտանիքների:

Նախարարը հայտնել է, որ իր գերատեսչությանը հաջողվել է տվյալներ հավաքել Նեպալում գտնվող 2050 ֆրանսիացիների վերաբերյալ: Նրանց թվում կան միջին ծանրության վնասվածքներ ստացած մարդիկ, «բայց նրանց կյանքին վտանգ չի սպառնում»: «Ֆրանսիայի 563 քաղաքացիների վերաբերյալ տեղեկություններ առայժմ չկան»,- ասել է նախարարը:

Նա նշել է, որ «Կատմանդուի օդանավակայանն սկսել է ընդունել կոմերցիոն չվերթներ, «սակայն նրա հնարավորություններն սպառվում են մարդասիրական օգնություն փոխադրող մեծ թվով ինքնաթիռների կապակցությամբ»:

«Ֆրանսիան այսօր երեկոյան կուղարկի հումանիտար օգնությամբ ևս մեկ ինքնաթիռ: Օդանավում կլինեն շուրջ 50 մարդ և 20 տոննա հումանիտար բեռներ»,- հայտնել է նախարարը: Նաև թռիչքի է պատրաստվում երրորդ ինքնաթիռը՝ 40 տոննա բեռներով: Բոլոր օդանավերը հետդարձի ճանապարհին կտեղափոխեն Ֆրանսիայի և այլ երկրների՝ Նեպալից հեռացող քաղաքացիներին, հաղորդել է ՏԱՍՍ-ը: