Իրաքում սպանվել է ԻՊ-ի «Պաշտպանության նախարարը»

Իրաքում ապրիլի 28-ին սպանվել են Իսլամական պետության ղեկավարներից մեկը, այսպես կոչված «Պաշտպանության նախարար» Շեյթ Սամերային և նրա ութ զինակիցներ:

Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, դեպքը տեղի է ունեցել Նինվե մարզում ահաբեկիչների դիրքերի օդային ռմբակոծությունների արդյունքում: Նախարարի ոչնչացումն ԻՊ-ի համար հերթական լուրջ կորուստն է վերջին մի քանի օրվա ընթացքում: Նախորդ շաբաթվա վերջում լուրեր էին տարածվել կազմակերպության ղեկավար Աբու Բաքր ալ Բաղդադիի սպանության մասին:

Բաղդադի արևմուտքում գտնվող Ալ Մանսուր թաղամասում ականապատ մեքենայի պայթյունից նախնական տեղեկություններով երկու զոհ ու հինգ վիրավոր են արձանագրվել: Մեկ այլ ականապատ մեքենա պայթել է Բաղդադի Աամիլ թաղամասում, կան երկու զոհ ու ինը վիրավոր:

Իրաքի ռազմական աղբյուրների տեղեկացմամբ, թեժ բախումներ են տեղի ունեցել երկրի հյուսիսում գտնվող Բայջի գործարանի մոտ, որի ժամանակ ԻՊ-ի ահաբեկիչները փորձել են հարձակում գործել գործարանի վրա: Բախումների ժամանակ 14 ահաբեկիչ են սպանվել: Եվս ինն ահաբեկիչ սպանվել են Ռամադիի հյուսիսային շրջանների վրա հարձակման փորձ կատարելու ժամանակ: Կանխվել է ԻՊ-ի հարձակումը Թիքրիթի հարավում գտնվող Սիդ Ղարիբ շրջանի վրա:

ԻՊ-ի ահաբեկիչները սպանել են «Ռայ ան Նաս» թերթի ղեկավարին, ում նախօրեին առևանգել էին Մոսուլում:

«Իսլամական պետություն» ծայրահեղական կազմակերպությունը համարվում է աշխարհի ամենավտանգավոր, ամենախոշոր և միևնույն ժամանակ ամենահարուստ ահաբեկչական կազմակերպությունը, որը կարճ ժամանակում հսկայական տարածքներ է գրավել Սիրիայում և Իրաքում: ԻՊ կազմակերպությունում ընդգրկվել են 80 երկրի մոջահեդներ: