Միացյալ Թագավորությունում հարգանքի տուրք են մատուցել Ցեղասպանության զոհերի հիշատակին

Ամերիկյան «CNN» հեռուստաընկերության ուղիղ եթերում Միացյալ Թագավորությունում ՀՀ դեսպան Արմեն Սարգսյանն ապրիլի 23-ի երեկոյան հարցազրույց է տվել հայտնի հաղորդավար Քրիստիան Ամանպուրին: Պատասխանելով լրագրողի հարցին, թե արդյոք կարևոր է, թե ինչպես են անվանվում 1915թ. դեպքերը, դեսպան Սարգսյանը նշել է. «Կարևոր է: Մեր կյանքում բառերը միայն բառեր չեն, շատ հաճախ բառերը շատ խորը նշանակություն ունեն: Հայերիս համար «ցեղասպանություն» բառը նշանակում է 100 տարվա անարդարություն, 100 տարվա ցավ, ժխտում և հիշողություն այն սխալի, որ տեղի է ունեցել: «Ցեղասպանություն» բառը ճշգրտորեն ցույց է տալիս իրականությունը, իսկ իրականությունը կարևոր է: Որովհետև այն (ցեղասպանությունը) թուրքական կառավարության կողմից կազմակերպված էր Օսմանյան կայսրությունում, Արևելյան Անատոլիայում' ամբողջ ազգին (հայերին) բնաջնջելու նպատակ ով»:

Հաղորդավարի հարցադրմանը, թե ինչու է «ցեղասպանություն» բառը կարևոր հայերի համար, դեսպան Սարգսյանը պատասխանել է. «Հայերը կռվեցին (հաղթեցին) Լեռնային Ղարաբաղում ոչ միայն նրա համար, որ ճիշտ էին, այլև որպեսզի թույլ չտան ևս մեկ ցեղասպանություն։ Մենք ոչ միայն ցեղասպանության զոհերն ենք, այլև պատանդը: Թուրքերը ցեղասպանության մյուս պատանդն են: Նրանք հերքման պատանդն են»:

Ապրիլի 23-ին Լոնդոնի Սուրբ Եղիշե եկեղեցում կազմակերպվել է Հայոց ցեղասպանության զոհերի սրբադասման արարողության ուղիղ հեռարձակումը, որին ներկա են եղել հայ համայնքի բազմաթիվ ներկայացուցիչներ։ Երևանյան ժամանակով 19։15-ին ղողանջել են եկեղեցու զանգերը, որին հաջորդել է երգչախմբի կողմից «Սուրբ Սուրբ»-ի և «Հայր Մեր»-ի կատարումը։ Նույն ժամին եկեղեցական զանգեր են ղողանջել Լոնդոնի Սուրբ Մարիամ անգլիկան եկեղեցում՝ ի համերաշխություն հայ ժողովրդի և ի հիշատակ Հայոց ցեղասպանության զոհերի։

Ապրիլի 24-ին Լոնդոնի Սուրբ Եղիշե եկեղեցում տեղի է ունեցել պատարագ՝ նվիրված Հայոց ցեղասպանության զոհերի հիշատակին: Նույն օրը' երեկոյան, Լոնդոնի Պիկադիլիի անգլիկան Սուրբ Հակոբ եկեղեցում կազմակերպվել է համերգ՝ նվիրված Հայոց ցեղասպանության 100-րդ տարելիցին։ Համերգին հնչել են Արամ Խաչատրյանի, Կոմիտասի, Հարությունյանի և Միրզոյանի ստեղծագործությունները Լոնդոնի «Sinfonietta» նվագախմբի և լոնդոնահայ ջութակահարուհի Անի Բատիկյանի կատարմամբ: Ներկա են եղել հայ համայնքի ներկայացուցիչներ, օտարերկրյա դիվանագետներ, բրիտանացի հասարակական-քաղաքակ ան գործիչներ: Պատարագին և համերգին ներկա է եղել դեսպան Սարգսյանը։

Ապրիլի 24-ին հիշատակի արարողություն է կազմակերպել նաև Ուելսի հայ համայնքը Քարդիֆի «Խաղաղության տաճարի» հարևանությամբ գտնվող Հայոց ցեղասպանության զոհերի հիշատակը հավերժացնող խաչքար-հուշարձանի մոտ։ Ներկա են եղել հայ համայնքի ներկայացուցիչներ Ուելսի տարբեր քաղաքներից, Լոնդոնից, Մանչեսթերից, ինչպես նաև Ուելսի ասորի և ղպտի համայնքների ներկայացուցիչներ։

Այնուհետև միջոցառումը շարունակվել է Ուելսի Ազգային ժողովի մասնաշենքերից մեկում կազմակերպված քննարկումով։ Ելույթ են ունեցել Հայ առաքելական եկեղեցում Ուելսի ծխական խորհրդի նախագահ Ջոն Թորոսյանը, Հոլոքոսթի վերապրող, ցեղասպանությունների դեմ պայքարի հայտնի մարտիկ, գիտնական և հեղինակ Ռութ Բարնեթը, պատմաբան և լրագրող Մայք Ջոզեֆը, հայր Ներսես Ներսեսյանը և ՄԹ-ում ՀՀ դեսպանության խորհրդական Արա Մարգարյանը։ Միջոցառումն ավարտվել է Պատրիկ Թոմասի «Հիշելով Հայոց ցեղասպանությունը» գրքի շնորհանդեսով։

Նույն օրը հիշատակի միջոցառումներ են կազմակերպվել նաև Մանչեսթերի և Բիրմինգհեմի հայ համայնքներում: