Նեպալի բնակիչը փրկվել է 60 ժամ փլատակների տակ մնալուց հետո

Նեպալի բնակիչն ապրիլի 29-ին երկրի մայրաքաղաք Կատմանդուում փրկվել է յոթհարկանի բնակելի շենքի փլատակների տակ 60 ժամ մնալուց հետո: Այդ մասին, ինչպես տեղեկացնում է «Արմենպրես»-ը, իր կայքում հաղորդել է «Հիմալայան թայմս» թերթը:

20-ամյա երիտասարդը հայտնաբերվել է նեպալցի, չինացի և թուրք փրկարարների կողմից: Նրան տեղափոխել են հիվանդանոց:

Ըստ վերջին տվյալների՝ Նեպալում տեղի ունեցած երկրաշարժի հետևանքով զոհվածների թիվը գերազանցել է 5 հազարը, իսկ տուժածների ընդհանուր թիվն անցնում է 10 հազարից:

7,9 մագնիտուդով երկրաշարժը Նեպալում տեղի է ունեցել ապրիլի 25-ի առավոտյան: Դրա էպիկենտրոնը գտնվում էր երկրի մայրաքաղաք Կատմանդուից 82 կիլոմետր հյուսիս-արևմուտք ընկած շրջանում: Սեյսմոլոգները վերջին մի քանի օրվա ընթացքում գրանցել են շուրջ 70 հետցնցում, որոնցից ամենահզորը՝ 6,7 մագնիտուդով, գրանցվել է ապրիլի 26-ին:

Ստորգետնյա ցնցումներ են զգացվել նաև Հնդկաստանում, որտեղ զոհվել է ավելի քան 70 և տուժել շուրջ 250 մարդ, ինչպես նաև Մյանմայում, Բանգլադեշում և Տիբեթում:

Նեպալի վարչապետ Սուշիլ Կոյիրալան հայտարարել է, որ երկրում երկրաշարժի զոհերի թիվը կարող է հասնել 10 հազարի:

Նեպալի կառավարությունը եռօրյա սուգ է հայտարարել ավերիչ երկրաշարժի զոհերի հիշատակին հաղորդել է ՏԱՍՍ-ը: