Ամերիկուհին ճանաչվել է «Տարվա մայր»՝ Բալթիմորի անկարգությունների մասնակից որդուն ծեծելու համար (տեսանյութ)

Մերիլենդ նահանգի Բալթիմորում 6 երեխա ունեցող կինը ճանաչվել է «Տարվա մայր»՝ անկարգություններին մասնակից իր որդուն ծեծելու համար: Այս մասին հայտնել է Daily Mail-ը:

Տեսանյութում ցուցադրվում է, թե ինչպես է մայրը՝ Տոյա Գրահամը, իր 16-ամյա որդուն՝ Միշելին, ծեծում փողոցում՝ ականատեսների աչքի առաջ, որը մասնակցել է ոստիկանների դեմ ցույցերին:

Տեսանյութը նկարահանվել էր Բալթիմորում ապրիլի 27-ի անկարգությունների ժամանակ: Միանգամից մի քանի մարդ ուշադրություն են դարձրել կնոջ վրա, որը հարվածում է գլուխն ու դեմքը ծածկած տղային: Արդյունքում՝ կինը կարողանում է փողոցից հեռացնել իր որդուն:

«Ես շոկի մեջ էի, ես բարկացած էի, քանի որ երբեք չէի ուզենա տեսնել իմ որդուն նման բան անելիս»,- ասել է մայրը, երբ ճանաչել է դիմակը դեմքին ցույցերի մասնակցող որդուն:

Բալթիմորի ոստիկանապետ Էնթոնի Բաթսն իր ելույթում բերել է բողոքի ցույցերի մասնակցի մոր օրինակը՝ բարձր գնահատելով նրա արարքը:

Ոստիկանության կոմիսարը հանդես է եկել մամուլի ասուլիսով՝ նվիրված քաղաքի անկարգություններին, բացատրել է լրագրողներին, որ քաղաքային անկարգությունների մասնակիցներից շատերը տեղի ավագ դպրոցի աշակերտներ են, ու հավանության է արժանացրել մոր արարքը:

«Ես կցանկանայի, որ ավելի շատ լինեն մարդիկ, որոնք այսօր պատասխանատվություն կստանձնեին իրենց երեխաների համար»,- ասել է նա:

Հիշեցնենք, որ ցույցերի ժամանակ ձերբակալվել է մոտ 200 մարդ, այրվել է 15 շինություն ու 144 մեքենա: