Մեծ Բրիտանիան հավելյալ 5 մլն ֆունտ կհատկացնի երկրաշարժից տուժած Նեպալին

Մեծ Բրիտանիան 5 մլն ֆունտ գումարի լրացուցիչ օգնություն կհատկացնի երկրաշարժից տուժած Նեպալին, օգնության ընդհանուր գումարը կհասնի 15 միլիոնի: Այդ մասին, ինչպես տեղեկացնում է «Արմենպրես»-ը, ապրիլի 29-ին հայտարարել է Մեծ Բրիտանիայի միջազգային զարգացման նախարարությունը:

Հավելյալ ֆինանսավորումը թույլ կտա աղետյալ երկիր ուղարկել ևս երեսուն բժիշկ և ութ տոննա սարքավորում, բժշկական պատրաստուկներ և նյութեր, ինչպես նաև վրաններ և Էլեկտրագեներատոր:

Նաև բրիտանական իշխանությունները մարդասիրական օգնություն կտրամադրեն խմելու ջրի, պարենամթերքի և հիգիենայի միջոցների տեսքով:

7,9 մագնիտուդով երկրաշարժը Նեպալում տեղի է ունեցել ապրիլի 25-ի առավոտյան: Դրա էպիկենտրոնը գտնվում էր երկրի մայրաքաղաք Կատմանդուից 82 կիլոմետր հյուսիս-արևմուտք ընկած շրջանում: Սեյսմոլոգները վերջին մի քանի օրվա ընթացքում գրանցել են շուրջ 70 հետցնցում, որոնցից ամենահզորը՝ 6,7 մագնիտուդով, գրանցվել է ապրիլի 26-ին:

Ըստ վերջին տվյալների՝ Նեպալում երկրաշարժի հետևանքով զոհվածների թիվը գերազանցել է 5 հազարը, իսկ տուժածների ընդհանուր թիվն անցնում է 10 հազարից: Երկրի կառավարությունը եռօրյա սուգ է հայտարարել ավերիչ երկրաշարժի զոհերի հիշատակին, հաղորդել է ՌԻԱ Նովոստին:

Լուսանկարը' REUTERS