Մագնիտսկու օրենքը կարող է տարածվել նաև Ադրբեջանի վրա

ԱՄՆ-ի օրենսդիրներն աշխատում են Մագնիտսկու Ակտի ընդլայնման վրա այն բանի համար, որպեսզի այն տարածվի ոչ միայն Ռուսաստանի, այլ նաև այլ երկրների, այդ թվում' Ադրբեջանի վրա: «Մագնիտսկու ակտը երբեք չի եղել Ռուսաստանի դեմ, այն եղել է վատ անձանց դեմ և գլոբալ բնույթ է»,- հայտարարել է օրինագծի համահեղինակ, կոնգրեսական Ջիմ Մակգովերնը:

Ինչպես հաղորդում է «Արմենպրես»-ը, ադրբեջանական «Թուրան»-ի հետ Վաշինգտոնում ապրիլի 29-ին ունեցած զրույցում Մակգովերնն ասել է, որ նոր օրինագծի շուրջ քննարկումները ցուցանիշն են այն բանի, որ ԱՄՆ-ն և այլ երկրներ մարդու իրավունքները համարում են իրենց արտաքին քաղաքականության գլխավոր մասը:

«Թուրան»-ի թղթակցի այն հարցին, թե ադրբեջանական չինովնիկները կարո՞ղ են ընկնել այդ օրենքի տակ, Մակգովերնն ասել է, որ օրենքն ուղղված է ամբողջ աշխարհում բոլոր կոռումպացված չինովնիկների և մարդու իրավունքների խախտողների դեմ, և նրանց կսկսեն պատասխանատվության ենթարկել:

Իր հերքին Freedom House միջազգային իրավապաշտպան կազմակերպության փոխնախագահ Դանիել Կալինգերտը դիմել է ԱՄՆ Կոնգրեսի արտաքին հարցերով հանձնաժողովին' կոչ անելով ընդլայնել Մագնիտսկու ակտը:

Աշխարհում շատ մարդիկ կան, ովքեր դարձել են ճնշման զոհ այն բանի համար, որ համարձակվել են խոսել արդարության և ազատության մասին»,-գրել է նա և այլոց թվում նշել ադրբեջանցի ակտիվիստներ Ռասուլ Ջաֆարովի ու Խադիջա Իսմայիլովայի անունները:

Ջաֆարովը 6,5 տարի ժամկետով ազատազրկման է դատապարտվել Ադրբեջանի կառավարության կողմից մարդու իրավունքների խախտումները բացահայտելու համար, իսկ Իսմայիլովան հայտնվել է բանտում այն բանի համար, որ հետազոտել է և հրապարակել Ադրբեջանի նախագահի ընտանիքի կոռուպցիայի մասին հոդվածներ»,- հավելել է նա:

Կոնգրեսում աղբյուրները «Թուրան»-ին հայտնել են, թե նման փաստերը ամրապնդում են Վաշինգտոնում տարածված այն կարծիքը, որ ադրբեջանցի չինովնիկների դեմ հարկավոր է պատժամիջոցներ կիրառել:

«Ադրբեջանական կառավարությունը փնտրում և հաջողությամբ բազմաթիվ լոբբիստներ կամ բարեկամներ է վարձում Կոնգրեսում, որպեսզի նրանք աչք փակեն մարդու իրավունքների խախտումների վրա: Բայց դա անելը գնալով ավելի է դժվարանում, քանի որ ավելի շատ մարդիկ են սկսել հասկանալ, թե իրականում ինչ է տեղի ունենում Ադրբեջանում,- «Թուրան»-ի թղթակցին ասել է Կոնգրեսում անունը հրապարակել չցանկացած աղբյուրը:

2012 թվականից Մագնիտսկու օրենքով 38 անձանց մուտքն արգելվել է ԱՄՆ և սառեցվել են նրանց բանկային հաշիվները: