Նյու Յորքում հազար մարդ է մասնակցել Բալթիմորի ցուցարարների հետ համերաշխության ակցիային

Նյու Յորքի Յունիոն-սքվեր հրապարակում ապրիլի 29-ի երեկոյան շուրջ հազար մարդ է հավաքվել բողոքի ակցիա անցկացնելու համար՝ ի նշան Բալթիմորի ցուցարարների հետ համերաշխության, տեղեկացնում է «Արմենպրես»-ը:

Ցույցի կազմակերպիչները սոցիալական ցանցերում կոչ են արել գերքաղաքի բնակիչներին՝ միավորվել ոստիկանական կամայականության դեմ, որի վերջին «աղաղակող դրսևորումը» դարձավ Բալթիմորի երիտասարդ թխամորթ բնակչի՝ Ֆրեդի Գրեյի մահը:

Հրապարակում հավաքվածներն արդար պատիժ են պահանջել Գրեյի զոհվելու մեջ բոլոր մեղավորների համար, ինչպես նաև՝ արմատական փոփոխություններ երկրում իրավակարգի ապահովման պրակտիկայում: Ըստ վերջին տվյալների` ոստիկանությունը ձերբակալել է բողոքի ակցիայի, շուրջ հարյուր մասնակցի:

Ինչպես նշում է ՏԱՍՍ-ը, համանման ակցիաներ են տեղի ունեցել ԱՄՆ-ի մի շարք այլ քաղաքներում, մասնավորապես, Հյուսթոնում, Բոսթոնում և Մինիապոլիսում: The Washington Post թերթի հաշվարկներով՝ 400-500 մարդ է մասնակցել ԱՄՆ-ի մայրաքաղաք Վաշինգտոնում կայացած բողոքի երթին:

Բալթիմորում հուզումներն սկսվել են ապրիլի 27-ին՝ 25-ամյա սևամորթ ամերիկացի Ֆրեդի Գրեյի թաղումից հետո: Ապրիլի 12-ին մի քանի ոստիկաններ լուրջ վնասվածքներ են հասցրել նրան: Նա կոմայի մեջ է ընկել, կլինիկական մահ տարել, բժիշկների ջանքերով վերադարձվել կյանքի, ենթարկվել բարդ վիրահատության, բայց ապրիլի 19-ին, չնայած բժիշկների բոլոր ջանքերին, մահացել է:

Լուսանկարը' EPA/ANDREW GOMBERT