ԱՄՆ պետքարտուղարի մարդու իրավունքների գծով օգնականը կայցելի Բաքու

ԱՄՆ պետքարտուղարի ժողովրդավարության և մարդու իրավունքների գծով օգնական Թոմ Մալինովսկին ծրագրում է երկու շաբաթ հետո այցելել Ադրբեջան: Այցի նպատակը Ադրբեջանում մարդու իրավունքների, ժողովրդավարության և քաղաքացիական հասարակության խնդիրներով երկխոսության վերսկսումն է պաշտոնական Բաքվի հետ:

Այս մասին, ինչպես հաղորդում է «Արմենպրես»-ը, հայտնում է «Թուրան» լրատվական գործակալությոընը' հղում կատարելով տեղեկացված դիվանագիտական աղբյուրին:

ԱՄՆ պետքարտուղարի մյուս օգնական Վիկտորյա Նուլանդի փետրվարին Բաքու կատարած այցի ընթացքում հայտարարվել էր ԱՄՆ-ի և Ադրբեջանի միջև այդ հարցերի շուրջ երկխոսություն սկսելու մասին:

«Վաշինգտոնում աղբյուրները չեն հայտնում Մալինովսկու այցի մանրամասները»,- հաղորդում է «Թուրան»-ը:

Միջազգային ԶԼՄ-ները հայտնել են Ադրբեջանում մարդու իրավունքների աղետալի վիճակի հետ կապված միայն այս տարի 35-ից ավելի ակտիվիստների, իրավապաշտպանների, լրագրողների ձերբակալության մասին, ովքեր համարձակվել են հրապարակավ քննադատել իշխանություններին:

«Թուրան»-ը հայտնել է, որ ԱՄՆ-ի օրենսդիրներն աշխատում են Մագնիտսկու ակտի ընդլայնման վրա, որպեսզի այն տարածվի ոչ միայն Ռուսաստանի, այլ նաև այլ երկրների, այդ թվում' Ադրբեջանի վրա: Կոնգրեսում աղբյուրները «Թուրան»-ին հայտնել են, որ մարդու իրավունքների խախտումների մեծ թվով փաստերը ամրապնդում են Վաշինգտոնում տարածված այն կարծիքը, որ ադրբեջանցի չինովնիկների դեմ հարկավոր է պատժամիջոցներ կիրառել:

Ըստ միջազգային իրավապաշտպան կազմակերպությունների' Ադրբեջանում ներկայում 100-ից ավելի քաղբանտարկյալներ կան: