Երեք ցենտներով նիհարած բրիտանացուց 21 կիլոգրամ ավելորդ մաշկ են հեռացրել

Մեծ Բրիտանիայի բնակիչ Փոլ Մեյսոնից, որը երեք ցենտներով նիհարել է հանուն իր սիրեցյալի, բժիշկները հեռացրել են 21 կիլոգրամ կախ ընկած մաշկ: Այս մասին, ինչպես տեղեկացնում է «Արմենպրես»-ը, հաղորդել է The Daily Mirror-ը: Վիրահատությունը կատարվել է Նյու Յորքի Lenox Hill հիվանդանոցում և տևել է իննուկես ժամ:

54-ամյա Մեյսոնի հարսնացուն՝ 41-ամյա Ռեբեկա Մաունթինը, պատմել է, որ իր փեսացուն գերազանց է տարել վիրաբուժական ընթացակարգը և այժմ վերականգնման բուժընթաց է անցնում: Նրա խոսքով՝ դուրս գրվելուց հետո նա Նյու Յորքում կանցկացնի ևս շուրջ չորս շաբաթ:

Մեյսոնը, որը կշռում էր 445 կիլոգրամ, որոշել է նիհարել 2013 թվականին Facebook-ում Մասաչուսեթսից Ռեբեկա Մաունթինի հետ ծանոթանալուց հետո: Տղամարդու խոսքով՝ սկզբում ինքը նույնիսկ չէր կարծում, թե իրենց միջև կարող են ռոմանտիկ հարաբերություններ հաստատվել, սակայն Skype-ով զույգի առաջին իսկ զրույցը ձգվել է մինչև 4,5 ժամ:

Նշվում է, որ Ռեբեկա Մաունթինը կշռում է շուրջ 50 կիլոգրամ: Այն բանից հետո, ինչ Մեյսոնը նիհարել է, նրա քաշը կազմել է 140 կիլոգրամ:

Լուսանկարը' Ferrari Press / East News