«Էրդողանի կուսակցությանը կրոնից շատ փողն է հետաքրքրում». Նոբելյան մրցանակակիր

Նոբելյան մրցանակակիր թուրք գրող Օրհան Փամուքը հայտարարել է, որ ներկայում Թուրքիայի բարձրագույն ղեկավարության շարքերում պաշտոններ զբաղեցնող իսլամականներն ավելի շատ հետաքրքրված են փողի, քան կրոնի մեջ: Այս մասին, ինչպես հաղորդում է «Արմենպրես»-ը, Փամուքը հայտարարել է գերմանական Die Zeit շաբաթաթեթրին տված հարցազրույցում:

«Թուրքիայի իսլամականները հիմնականում ծագումով հասարակության ներքին շերտերից են: Դրանք նախկին չարացած գյուղաբնակներն են, որոնք մոռացել են, թե ինչ էր տեղի ունենում իրենց հետ այն ծանր ժամանակներում: 12-13 տարի հետո նրանք դարձան պետական կադրեր: Այժմ նրանք ունեն իրենց ձեռքերը յուրաքանչյուր հաստատությունում, և իրենք են ներկայացնում կենտրոնացված իշխանությունը: Նրանք ավելի շատ հետաքրքրված են փողի, քան կրոնի մեջ: Նրանք իրենց հռետորաբանության մեջ ընդամենը քողարկվում են իսլամով», -ասել է նա:

Փամուքն ընդգծել է, որ քաղաքական իսլամը, որը որոշակի հմայք ուներ 1990-ական թվականներին և գրավում էր անգամ մարքսիստների և կոմունիստների ուշադրությունը, կոռուպցիայի պատճառով կորցրել է իր նախկին կերպարը:

2013 թվականի դեկտեմբերի 17-ին Թուրքիան ցնցվել էր հանրապետության պատմության մեջ «Մեծ կաշառք» անունը ստացած խոշորագույն կոռուպցիոն սկանդալով: Սկանդալում հայտնվել էին չորս նախարարներ և նրանց որդիները, Թուրքիայի վարչապետ, այժմ նախագահ Թայիփ Էրդողանի որդին, դուստրը և փեսան, բազմաթիվ չինովնիկներ և իշխանությունների մոտ կանգնած բարձր մակարդակի բիզնեսմեններ: Կոռուպցիոն սխեմային ենթադրվող մասնակիցները հարյուր միլիարդավոր դոլարների հասնող ֆինանսական մեքենայություններ են կատարել:

Դեկտեմբերյան կոռուպցիոն սկանդալից անմիջապես հետո Էրդողանը հայտարարել էր, որ դրա հետևում կանգնած են ԱՄՆ-ում վտարանդի արդի իսլամի գաղափարախոս Ֆաթուլլահ Գյուլենի հետևորդները, որոնք ցանկանում են տապալել իր կառավարությունը: Էրդողանի հանձնարարությամբ աշխատանքից հեռացվել կամ ձերբակալվել են այդ կոռուպցիոն սկանդալը բացահայտած հազարից ավելի փաստաբաններ, դատախազության և ոստիկանության աշխատակիցներ:

Իրավապահ և դատական համակարգերը գյուլենականներից «մաքրելու» գործընթացը Թուրքիայում շարունակվում է մինչ օրս: