Եվրահանձնաժողովը լրացուցիչ 16,6 մլն եվրո է հատկացրել Նեպալին օգնելու համար

Եվրահանձնաժողովը լրացուցիչ 16,6 մլն եվրո է հատկացրել Նեպալում երկրաշարժի հետևանքները հաղթահարելու համար: Այդ մասին, ինչպես տեղեկացնում է «Արմենպրես»-ը, ասված է ԵԽ-ի հայտարարության մեջ, որը մայիսի 4-ին տարածվել է Բրյուսելում:

«Եվրահանձնաժողովն այսօր հավանություն տվեց Նեպալին 16,6 մլն եվրոյի չափով ֆինանսական օգնություն տրամադրելուն մեկ շաբաթ առաջ երկիրը պատուհասած ավերիչ երկրաշարժից հետո նրանց աջակցելու համար: Օգնությունը ցույց կտրվի անմիջականորեն Նեպալի կառավարությանը»,- պարզաբանվում է հայտարարության մեջ:

ԵԽ-ն ընդգծել է, որ հանրակցությունն արդեն 22,6 մլն եվրո է հատկացրել Նեպալին: Եվրահանձնաժողովը նաև նշել է, որ երկրաշարժից Նեպալի կրած վնասի ամբողջական գնահատումից հետո Եվրամիությունը կքննարկի երկրին հետագա օգնության հնարավորությունը:

«Մենք կօգնենք այնքան, որքան հարկավոր կլինի»,- մամուլի ասուլիսում ասել է մարդասիրական օգնության և ճգնաժամային կառավարման հարցերով եվրակոմիսար Խրիստոս Ստիլիանիդիսը:

Ավելի վաղ հաղորդվել է, որ Նեպալ են ժամանել ԱՄՆ-ի զինծառայողներ և փրկարար ծառայության ինքնաթիռներ, որոնք կօգնեն մարդասիրական բեռները հասցնել անցած շաբաթ ավերիչ երկրաշարժից տուժած երկրի հեռավոր շրջաններ: Ինքնաթիռների անբավարարությունը դժվարացնում էր փրկարար աշխատանքներն աղետի էպիկենտրոնի մերձակայքում: Իսկ այժմ այդ խնդրի լուծմանը կմասնակցեն ԱՄՆ-ի շուրջ հարյուր ծովային հետևակայիններ և չորս ինքնաթիռ:

7,9 մագնիտուդով երկրաշարժը ապրիլի 25-ին տեղի է ունեցել Նեպալի արևմտյան տարածաշրջանում՝ մայրաքաղաք Կատմանդուից 84 կիլոմետր հեռավորության վրա: Երկրաշարժի օջախը եղել է 15 կիլոմետր խորության վրա: Հիմնական երկրաշարժից հետո գրանցվել են 3,2-ից մինչև 6,9 մագնիտուդով շուրջ 90 հետցնցումներ:

Ըստ վերջին տվյալների՝ տարերային աղետից զոհվածների թիվը գերազանցել է 7 հազարը, ևս ավելի քան 14,2 հազար մարդ վերքեր է ստացել: Նեպալի պաշտպանության նախարարության տեղեկատվության համաձայն՝ ավերվել է 140 հազար բնակելի շենք, վնասվել է ևս ավելի քան 140 հազար շինություն, հաղորդել է ՏԱՍՍ-ը: