ՄԱԿ-ում բացվել է Հայրենական մեծ պատերազմի մասին պատմող լուսանկարների ցուցահանդեսը

ՄԱԿ-ի Նյու Յորքի կենտրոնակայանում բացվել է «Վերջին համաշխարհային պատերազմը. հիշել խաղաղության համար» լուսանկարների ցուցահանդեսը, տեղեկացնում է «Արմենպրես»-ը: Ցուցադրանքը, որի կազմակերպիչներն են Ռուսաստանը, Հայաստանը, Ադրբեջանը, Բելառուսը, Ղազախստանը, Ղրղզստանը, Տաջիկստանը և Թուրքմենստանը, բաղկացած է 40 լուսանկարից և պայմանականորեն բաժանված է երկու մասի: Առաջին մասը ներառում է 23 լուսանկար, որոնք արվել են մարտական փառքի վայրերում և թիկունքում:

Ցուցահանդեսի երկրորդ մասը, որը տեղավորվել է Գլխավոր ասամբլեայի ճեմասրահում, նվիրված է նախկին խորհրդային միության 15 հանրապետությունների հերոսներին: Այն ներառում է Միխայիլ Եգորովի (Ռուսաստան), Միլիտոն Կանտարիայի (Վրաստան), Հովհաննես Բաղրամյանի (Հայաստան), Մարատ Կազեյի (Բելառուս), Մարիա Մելնիկայտեի (Լիտվա) և ուրիշների դիմանկարները:

Ինչպես նշում է ՏԱՍՍ-ը, ցուցահանդեսի հյուրերին դիմել է ՄԱԿ-ին առընթեր ՌԴ-ի մշտական ներկայացուցիչ Վիտալի Չուրկինը: Նրա խոսքով՝ ցուցադրանքը վկայում է, որ ֆաշիզմի նկատմամբ հաղթանակը ԽՍՀՄ-ի բոլոր ժողովուրդների համատեղ ջանքերի արդյունքն է:

Մայիսի 4-ին Ժնևում ՄԱԿ-ի բաժանմունքում բացվում է Հայրենական մեծ պատերազմի մասին ֆիլմերի փառատոնը՝ նվիրված Մեծ հաղթանակի 70-րդ տարեդարձին: Մինչև մայիսի 8-ը Ազգերի պալատի կինոսրահում կցուցադրվեն կինեմատոգրաֆի դասականներ դարձած «Թռչում են կռունկները» (1957), «Մարդու ճակատագիրը» (1959), «Նրանք մարտնչում էին հայրենիքի համար» (1975), գեղարվեստական ժապավենները, «Սովորական ֆաշիզմ» նշանավոր վավերագրական ֆիլմը, ինչպես նաև վերջին տարիներին թողարկված ֆիլմեր, այդ թվում՝ «Սպիտակ վագրը», «Բրեստի ամրոցը», «Ստալինգրադ» և «Մշուշում»:

ՄԱԿ-ի Նյու Յորքի կենտրոնակայանում մայիսի 5-ին մեկնարկում են մի շարք միջոցառումներ՝ նվիրված Երկրորդ համաշխարհային պատերազմի ավարտման 70-ամյակին, տեղեկացնում է «Արմենպրես»-ը: Ծրագիրը ներառում է համաշխարհային կազմակերպության Գլխավոր ասամբլեայի հանդիսավոր նիստը և համերգ, ինչպես նաև «Խաղաղության ծառի» տնկումը և լուսանկարների երկու ցուցահանդեսների կազմակերպումը: