Ժնևում ՄԱԿ-ի բանագնացի գլխավորությամբ մեկնարկում են սիրիական ճգնաժամի կարգավորման վերաբերյալ խորհրդակցությունները

Ժնևի ՄԱԿ-ի գրասենյակում մեկնարկել են Սիրիայի ճգնաժամի կարգավորման վերաբերյալ խորհրդակցությունները:

Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, Սիրիայի հարցով ՄԱԿ-ի հատուկ բանագնաց Ստեֆան դե Միստուրան հայտարարել է, որ սիրիական ճգնաժամի վերաբերյալ Ժնևում մեկնարկում են խորհրդակցություններ, այլ ոչ թե խաղաղ բանակցություններ: Նրա խոսքով՝ շուրջ 60 հրավերներ են ուղարկվել սիրիական հակամարտությանն առնչվող կողմերին, ինչպես նաև սիրիական կառավարությանը: Պետք է «անհրաժեշտ ջանքեր գործադրել սիրիական հակամարտությանը վերջ տալու համար»,- նշել է նա՝ պարզաբանելով, որ սիրիական հա կամարտության մեջ նոր մասնակից է ընդգրկվել, և օրինակ է բերել «Իսլամական պետությանը»: Հալեպում ռազմական գործողությունները սառեցնելու մասին նշել է, որ այստեղ դեռ հաջողություն չի գրանցվել:

ՄԱԿ-ի գլխավոր քարտուղարի մամուլի խոսնակ Ահմադ Ֆաուզին ավելի վաղ տեղեկացրել էր, որ հրավերներ են ուղարկվել սիրիական կառավարության և ընդդիմության ներկայացուցիչներին, ինչպես նաև Իրանին, Սաուդյան Արաբիային, ՄԱԿ-ի հինգ մշտական անդամ-երկրներին: Հանդիպումների ընթացքում Ստեֆան դե Միստուրան մտադիր է վերլուծել 2012թ. հունիսի 30-ին ժնևյան համաձայնագրի ընդունումից հետո Սիրիայում տիրող ներկա իրավիճակը: Նրա խոսքով՝ մոտ 5-6 շաբաթում Ստեֆան դե Միստուրան առանձին հանդիպումներ կունենա հակամարտության բոլոր կողմերի հետ: Հանդիպումներից հետո ՄԱԿ-ի բանագնացը զեկույց կներկայացնի ՄԱԿ-ի գլխավոր քարտուղարին: Հանդիպումների ընթացքում նախատեսվում է քննարկել Մոսկվայում կայացած միջսիրիական երկխոսության երկու փուլերի արդյունքները: