«Հրապարակի» դրամական միջոցների վրա արգելանք է դրվել

Կենտրոն, Նորք-Մարաշ վարչական շրջանների ընդհանուր իրավասության դատարանի դատավոր Գագիկ Խանդանյանը արգելանք է դրել «Հրապարակի» դրամական միջոցների վրա:

Օրաթեթի դեմ հայց է ներկայացրել փաստաբան Արթուր Գրիգորյանը՝ պահանջելով 18 մլն դրամ՝ որպես վնասի հատուցում, նույն գումարի չափով արգելանք թերթի դրամական միջոցների և գույքի, ինչպես նաև «Արթուր Գրիգորյանի մասին տեղեկություններ տարածելու իրավունքի» վրա։ Դատավորը բավարարել է այս պահանջը, ինչը նշանակում է, որ օրաթերթը չի կարողանալու տնօրինել իր դրամական միջոցները։ Սա էլ իր հերթին կարող է հանգեցնել օրաթերթի տպագրության դադարեցմանը։

Մեր ունեցած տվյալներով՝ Արթուր Գրիգորյանին վրդովեցրել է ոչ թե «Հրապարակի» որևէ հոդված, այլ թերթի էլեկտրոնային տարբերակում որոշ ընթերցողների մեկնաբանությունները։ Եվ մի քանի՝ իր կարծիքով վիրավորական մեկնաբանությունների համար փաստաբանը թերթից 18 մլն դրամ է պահանջում։ Սա արդեն կարող է չափազանց վտանգավոր դառնալ, քանի որ ոչ ոք չի կարող երաշխավորել, որ մի օր էլ չեն սկսի մարդկանց դատարաններ քարշ տալ սոցիալական ցանցերում իրենց անձնական կարծիքները հայտնելու համար։

Հիշեցնենք նաև, որ ներկայումս Սահմանադրական դատարանը պատրաստվում է քննել օմբուդսմենի հայցը՝ ՀՀ քաղաքացիական օրենսգրքի 1087 հոդվածի՝ ՀՀ Սահմանադրությանը համապատասխանության հարցով։