Հուշարձանների պահպանումը յուրաքանչյուր ժողովրդի վերաբերմունքն է իր անցյալի և իր նախնիների նկատմամբ

Ապրիլի 18-ը ՅՈՒՆԵՍԿՕ-ն նշում է որպես Հուշարձանների ու տեսարժան վայրերի միջազգային օր: Այն նշվում է 1982թ.-ից Հուշարձանների և տեսարժան վայրերի միջազգային խորհրդի (ԻԿՕՄՕՍ) առաջարկությամբ: Այս տարի նաև լրանում է «Համաշխարհային մշակութային և բնության ժառանգության պահպանության մասին կոնվենցիայի» ընդունման 40-ամյակը, որն անցկացվում է «Համաշխարհային ժառանգություն» անվանումով: Ի նշանավորումն կոնվենցիայի 40-րդ տարեդարձի' այս տարի ողջ աշխարհում ժառանգության պահապաններին առաջարկվել է հանդես գալ մշակութային ու բնության ժառանգությանը նվիրված նախաձեռնություններով: Հայաստանն այդ կոնվենցիան վավերացրել է 1993թ. սեպտեմբերի 5-ին:

Հուշարձանների և տեսարժան վայրերի պահպանության միջազգային օրվա կապակցությամբ մի շարք թեմատիկ միջոցառումներ են իրականացվում հանրապետության տարբեր պատմամշակութային վայրերում ու թանգարաններում: Այս համատեքստում էլ Երևանի քաղաքապետարանի «Էրեբունի» պատմահնագիտական արգելոց-թանգարանում այսօր բացվեց «Համաշխարհային ժառանգության հնագիտական վայրերը» ցուցահանդեսը' ներկայացնելով համաշխարհային ժառանգություն ճանաչված 2 տասնյակ հնագիտական վայրեր: Ճանաչողականից բացի, ցուցահանդեսի նպատակն է բարձրացնել հնագիտական ժառանգության նկատմամբ պատասխանատվությունը և մտորել Համաշխարհային ժառանգության ցուցակում հայկական հնագիտական վայրերը ներկայացված տեսնելու հեռանկարի շուրջ:

Միջոցառմանը բացման խոսքով հանդես եկավ «Էրեբունի» պատմահնագիտական արգելոց-թանգարանի տնօրեն, ԻԿՕՄՕՍ/ Հայաստանի նախագահ Գագիկ Գյուրջյանը, ով իր ելույթում ասաց. «Այս ցուցահանդեսով մենք ցանկացել ենք նաև շեշտել այն չափորոշիչները, որոնք թույլ են տալիս նոր հուշարձաններ գրանցել ՅՈՒՆԵՍԿՕ-ի հեղինակավոր ցուցակում: Հուսով ենք 'ցուցահանդեսը դիտող մեր այցելուների մոտ կընդլայնվի և կամրապնդվի արժեքի և բացառիկության մասին պատկերացումը»:

Ողջույնի խոսքով հանդես եկավ «ԻԿՕՄՕՍ/Հայաստան» կազմակերպության անդամ, ՀՀ Գլխավոր դատախազ Աղվան Հովսեփյանը, ով նշեց, որ հուշարձանների պահպանումը յուրաքանչյուր ժողովրդի վերաբերմունքն է իր անցյալի և իր նախնիների նկատմամբ: ՅՈՒՆԵՍԿՕ-ի գործերով Հայաստանի ազգային հանձնաժողովի գլխ. քարտուղար Վահրամ Կաժոյանը խոսեց Համաշխարհային ժառանգության կոնվենցիայի' մշակութային բազմազանությունների խրախուսման և այս կոնվենցիային Հայաստանի անդամակցության ու դրա արդյունավետության մասին: Ներկաներին ողջունեց և մշակութային ժառանգության հայ պահապաններին շնորհավորեց ՀՀ-ում Հունաստանի գործերի ժամանակավոր հավատարմարար Վասիլիկի Դիկոպուլոն:

Միջազգային տոնն արգելոց-թանգարանում նշանավորվեց նաև հասարակական նշանակություն ունեցող մեկ այլ իրադարձությամբ. տեղի ունեցավ թանգարանի շենքի կողային ճակատից դեպի գլխավոր ցուցասրահ տանող թեքահարթակի բացումը'նախատեսված տեղաշարժման սահմանափակ կարողություններ ունեցող մարդկանց համար:

«Ունիսոն» հասարակական կազմակերպության նախագահ Արմեն Ալավերդյանը, ով առաջինն էր փորձարկել թեքահարթակը, շնորհակալական խոսքեր հայտնեց Երևանի քաղաքապետարանին և արգելոց-թանգարանին' մշակութային այս օջախն իրենց հասանելի դարձնելու համար: Նա խոսեց նաև թեքահարթակի կարևորության մասին և ավելացրեց. «Ինչպես առաջադեմ բոլոր երկրներում, Հայաստանում նույնպես, շուտով չպետք է մնա մշակութային մի վայր, որի մուտքը հասանելի չէ բոլորի համար»:

Ներկաների թվում էին տարբեր բուհերի մի շարք ուսանողներ, նաև «Ունիսոն» ՀԿ-ի անդամներն ու «Փարոս» կամերային երգչախումբը, որը հանդես եկավ փոքրիկ համերգային ծրագրով:

«Համաշխարհային ժառանգության հնագիտական վայրերը» ցուցահանդեսը մինչև 2012թ. սեպտեմբերի 1-ը բաց կլինի բոլոր այցելուների համար: