SOCAR-ը դադարեցրել է Ադրբեջանում խոշորագույն նախագիծը

Ադրբեջանի պետական նավթային ընկերությունը (SOCAR) նավթի գնանկման պատճառով դադարեցրել է Բաքվից 60 կմ դեպի հարավ, Գարադաղի շրջանի Սանգաչալ ավանում նավթաքիմիական համալիրի շինարարության խոշորագույն` 9 մլրդ դոլար արժողությամբ նախագիծը:

Այս մասին, ինչպես հաղորդում է «Արմենպրես»-ը, Reuters-ին հայտնել է SOCAR-ի ռազմավարական զարգացման գծով փոխնախագահ Թոֆիկ Գահրամանովը:

Նախագծի վրա ներդրումը, որի նկատմամբ հետաքրքրություն են դրսևորել մի քանի արտասահմանյան ընկերություններ, այդ թվում' ճապոնական Misui-ն, սկզբում գնահատվել էր 17 մլրդ դոլար, սակայն նավթավերամշակման գործարանը նախագծից հանվելուց հետո, գնահատականն իջեցվել էր 8,5-9 մլրդ դոլարի:

Գահրամանովն ասել է, որ ընկերությունը կարող է վերադառնալ գազավերամշակման և նավթավերամշակման համալիրի նախագծին, եթե նավթի գները վերականգնվեն, իսկ այժմ կապիտալ վերանորոգման կենթարկեն Բաքվի նավթավերամշակման գործարանը և «Ազերքիմիա» քիմիական ընկերության օբյեկտները, որի վրա պետբյուջեից նախատեսվում է ծախսել 1,3 մլրդ դոլար:

Նրա խոսքով` նախագիծը պետք է իրականացվի մի քանի փուլով 4 տարվա ընթացքում, և այդ ժամանակի ընթացքում հնարավոր են արտադրության դադարեցումներ գործարանում: