Այսուհետ բոլոր հեռուստաընկերությունները պետք է ունենան ծրագրեր խուլուհամր հանրության համար

Արտակ Դավթյանի նախագահությամբ տեղի ունեցավ ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի հերթական նիստը, որի օրակարգում ընդգրկված օրենսդրական նախաձեռնություններից քննարկվեցին երկուսը: Մի շարք օրենսդրական նախաձեռնությունների քննարկումը հեղինակների առաջարկով հետաձգվեց:

Քննարկվեց ՀՀ կառավարության հեղինակած «Հեռուստատեսության եւ ռադիոյի մասին» ՀՀ օրենքում լրացում եւ փոփոխություն կատարելու մասին» օրինագիծը, որով սահմանվում է, որ Հայաստանում գործող բոլոր հեռուստաընկերությունները, որոնք հեռարձակում են նաեւ մանկական եւ/կամ լրատվական հեռուստահաղորդումներ, պարտավոր են իրենց ծրագրերում ապահովել խուլուհամր հանրության համար հնարավոր տեղեկատվության ստացման մատչելիությունը՝ օրվա եթերաժամում ունենալով առնվազն մեկական մանկական եւ լրատավական հեռուստահաղորդում՝ սուրդոթարգմանությամբ կամ հայերեն լուսագրով: Օրինագիծն ստացավ հանձնաժողովի դրական եզրակացությունը. այն կընդգրկվի ԱԺ առաջիկա քառօրյա նիստերի օրակարգի նախագծում:

Դրական եզրակացությամբ առաջիկա քառօրյա նիստերի օրակարգի նախագծում կընդգրկվի նաեւ ՀՀ կառավարության «Բարձրագույն եւ հետբուհական մասնագիտական կրթության մասին» ՀՀ օրենքում լրացումներ կատարելու մասին», «Լիցենզավորման մասին» ՀՀ օրենքում փոփոխություններ եւ լրացումներ կատարելու մասին» եւ «Պետական տուրքի մասին» ՀՀ օրենքում փոփոխություն եւ լրացում կատարելու մասին» օրինագծերի փաթեթը:

Մեկ այլ որոշմամբ հանձնաժողովը որոշեց ԱԺ գլխադասային այլ հանձնաժողովների հետ համատեղ դեկտեմբերի 13-ին անցկացնել խորհրդարանական լսումներ «Երեխաների իրավունքների պաշտպանությունը Հայաստանի կրթական ոլորտում » թեմայով, որի նախաձեռնողը ՅՈՒՆԻՍԵՖ-ն է: