Ադրբեջանում մեկ դոլարը կարժենա 3 մանաթ. իշխող կուսակցության տնտեսագետ

Աշխարհ 19 Մարտ, 2016 22:14

Ադրբեջանի իշխող «Ենի Ազերբայջան» կուսակցության եւ «Ժողովրդավարություն եւ բարեկեցություն շարժման» անդամ տնտեսագետ Ֆուադ Իբրահիմովը հայտարարել է, որ Ադրբեջանում մոտ ժամանակում մեկ ամերիկյան դոլարը կարժենա 3 մանաթ:

Ինչպես հաղորդում է «Արմենպրես»-ը, այս մասին Ադրբեջանի իշխող կուսակցության անդամը հայտարարել է ադրբեջանական xeber365.com կայքին տված հարցազրույցում:

Լրագրողի այն հարցին' մանաթի հերթական արժեզրկում սպասվում է, թե ոչ, եւ որն է մանաթի իրական արժեքը, ադրբեջանցի տնտեսագետը պատասխանել է.

«Ներկայիս իրողությունները կստիպեն, որ մոտ ժամանակում մանաթի արժեքը ամերիկյան դոլարի նկատմամբ գտնվի 2,85-3 մակարդակի վրա: Եթե մանաթի փոխարժեքն ազատականացվի, ապա այն անպայման կարժեզրկվի, քանի որ Ադրբեջանը ոչ մի տնտեսական լծակ չունի այն կայուն պահելու համար: Մենք ականատես ենք միայն AzTv-ում ադրբեջանական տնտեսության գովաբանմանը»:

Նրա խոսքով' Ադրբեջանը լճացումից հասել է անկման: Բանկերում հաճախորդների հետ խնդիր են ծագել, պարտատերերին սկսել են ձերբակալել:

«Դրանք անկման ազդանշաններն են: Ձեռնարկատերերը դադարեցրել են գործունեությունը, նրանք սնանկացած վիճակում են: Մի կերպ գոյատեւելով աշխատում են միայն առեւտրային օբյեկտները, մյուս բնագավառները անկման են գնում: Վերջին երեք ամիսներին բազմաթիվ բնագավառներում միջին ձեռնարկատիրությամբ զբաղվողներն ավելի շատ եկամտային եւ վարձակալական հարկեր են վճարում: Իսկ դա երկար չի կարող շարունակվել», -նշել է նա:

2015 թվականի դեկտեմբերի 21-ին Ադրբեջանի Կենտրոնական բանկի կողմից ազգային արտարժույթի' մանաթի լողացող փոխարժեքի անցնելու մասին ընդունած որոշումից հետո ամերիկյան դոլարի եւ եվրոյի նկատմամբ մանաթի փոխարժեքը 100 տոկոսից ավելի արժեզրկվել է, ինչը բերել է սննդամթերքի եւ այլ ապրանքների մոտ 50 տոկոսով թանկացման, ինչպես նաեւ աշխատատեղերի կրճատման ու գործազրկության աճի: Այդ բոլորը Ադրբեջանի շրջաններում բազմաթիվ բողոքներ է առաջացրել: Ադրբեջանական ԶԼՄ-ների համաձայն' երկրում սոցիալ-տնտեսական իրավիճակի վատացման պատճառով խիստ մեծացել են բանկերին պարտքեր ունենալու հողի վրա ինքնասպանությունների թիվը: