Ադրբեջանի տնտեսության մեջ անկում է սկսվել

Ադրբեջանի տնտեսական ցուցանիշները խիստ անհանգստացնող են: Այդ երկրի տնտեսությունը տարվա սկզբից լուրջ անկում է ապրում:

Այս մասին, ինչպես հաղորդում է «Արմենպրես»-ը' վկայակոչելով azadlig.org կայքը, facebook-ի իր էջում գրառել է ադրբեջանցի հայտնի տնտեսագետ Գուբադ Իբադօղլուն:

Ադրբեջանցի տնտեսագետի հետազոտությունների համաձայն' ընթացիկ տարվա առաջին երկու ամիսներին ՀՆԱ-ն, նախորդ տարվա նույն ժամանակաշրջանի համեմատ, 3,2 տոկոսով նվազել է: Միեւնույն ժամանակ 5,5 տոկոսով ՀՆԱ-ն ընկել է ոչ նավթային հատվածում:

«Այդ ժամանակաշրջանում նախորդ տարվա համեմատ 33,4 տոկոսով աշխատանքները նվազել են շինարարության եւ 5,3 տոկոսով' բեռնափոխադրման հատվածներում: Տարվա առաջին ամսում հաջողվել է հավաքագրել բյուջեում նախատեսված եկամուտների յուրաքանչյուր 5 մանաթից 4-ը, կյանքի է կոչվել ծրագրված ծախսերի յուրաքանչյուր 5 մանաթից 2-ը»,- նշել է նա:

Նրա խոսքով՝ այս տարվա հունվարին արտաքին առևտրաշրջանառության ծավալը կազմել է անցյալ տարվա նույն ամսվա երեք քառորդը: Այդ ժամանակաշրջանի համեմատ՝ ոչ նավթային հատվածի արտահանման ծավալը կիսով չափ կրճատվել է:

«Ամենաանհանգստացնողը ոչ նավթային հատվածում արտադրության և արտահանման մեջ խոր անկման միտման առկայությունն է: Հիշյալ ժամանակաշրջանում սպառողական գների ինդեքսը 11,7 տոկոսով, մթերքների գները' 14,8 տոկոսով, ոչ մթերային արտադրանքի գինը 15,7 տոկոսով աճել են: Դրա դիմաց բնակչության եկամուտներն աճել են ընդամենը 10 տոկոսով»,- գրել է Իբադօղլուն' նշելով, որ երկու անգամ (27,5 տոկոսով) աճել է խնդրահարույց վարկերի (չվերադարձվող) ծավալը:

«Ադրբեջանի տնտեսության անկումն արդեն երեք ամիս է' սկսված է»,- նշել է ադրբեջանցի տնտեսագետը: