ՌԴ նախագահը դատապարտել է Բրյուսելի «բարբարոսական պայթյունները»

Ռուսաստանի նախագահ Վլադիմիր Պուտինը ցավակցությունն է հայտնել Բելգիայի Ֆիլիպ թագավորին և Բելգիայի ողջ ժողովրդին Բրյուսելում իրականացված ահաբեկչական գործողությունների կապակցությամբ, տեղեկացնում է «Արմենպրես»-ը:

Ինչպես հայտարարել է ռուսական պետության ղեկավարի մամուլի քարտուղար Դմիտրի Պեսկովը, Պուտինը «վճռականորեն դատապարտել է այդ բարբարոսական հանցագործությունները»: «Այդ չարագործության դեմ պայքարն ամենաակտիվ միջազգային փոխգործակցություն է պահանջում»,- նշել է Պուտինը:

«Նախագահ Պուտինն արդեն ցավակցություն է հայտնել Բելգիայի Ֆիլիպ թագավորին Բրյուսելում կատարված մի շարք պայթյունների հետևանքով խաղաղ քաղաքացիների զոհվելու կապակցությամբ, նախագահը վճռականորեն դատապարտել է այդ բարբարոսական հանցագործությունները»,- հայտնել է Կրեմլի ներկայացուցիչը:

Պեսկովը հավելել է, որ Ռուսաստանի ղեկավարը ցավակցություն է հայտնել նաև Բելգիայի ժողովրդին: Նրա խոսքով՝ Պուտինը «հավաստիացրել է բելգիացիների հետ ռուսաստանցիների լիակատար համերաշխությունն այս դժվարին ժամերին»:

Դա արդարացում չունեցող բարբարոսական հանցագործություն է, որը հերթական անգամ հաստատում է, որ ահաբեկչությունը սահմաններ չի ճանաչում և սպառնում է ամբողջ աշխարհի ժողովուրդներին: Ռուսաստանի նախագահը վստահություն է հայտնել, որ մարդասպանները և նրանց հանցակիցներն իրենց արժանի պատիժը կկրեն, և կարեկցանքի խոսքեր է փոխանցել զոհվածների հարազատներին ու մերձավորներին, ինչպես նաև շուտափույթ ապաքինում է մաղթել բոլոր տուժածներին, հաղորդել է ՏԱՍՍ գործակալությունը: